PADAYON ang pag-ubos sa ihap sa mga bag-ong kaso sa coronavirus disease (Covid-19) sa Cagayan de Oro human 14 ra ka mga residente ang mipositibo sa Sars-CoV-2.
Ang kinatibuk-ang ihap sa mga kumpirmadong kaso sa dakbayan anaa na sa 3,985.
Matud sa City Health Office, sa 14 ka mga bag-ong mga kaso, duha ang mga persons deprived of liberty (PDLs), upat ang mga local cases with link, pito ang mga local index nga mga kaso, ug usa ang local authorized person outside residence (Apor).
Sa 3,985 nga kinatibuk-ang kaso sa Covid-19 sa syudad, 423 ang mga returning overseas Filipino workers/locally stranded individuals (ROFs/LSIs) ug 3,562 ang mga local transmissions.
Aduna nay 156 ka mga aktibong kaso ang Cagayan de Oro diin 49 niini na-admit sa Northern Mindanao Medical Center ug uban pang mga ospital sa syudad, 106 ang mga outpatients, ug usa ang ROF.
Gawas niini, aduna sab natala nga pito ka mga pasyente nga naka-rekober na. Sa karon, anaa na sa 3,639 ang ihap sa mga nakarekober nga mga kaso sa dakbayan.
Sa maong numero, 302 ang mga LSIs, 119 ang mga ROFs, ug 3,218 ang mga lokal nga kaso (community: 2,718; Apors: 500).
Ang recovery rate sa Cagayan de Oro anaa na sa 91.31 percent.
Niabot sa 190 ang ihap sa mga namatay sa Covid-19 sa syudad.