Kanunayng mosungag ang oposisyon sa pamunoan ni Pres. Rodrigo Duterte, sama nila ni Vice Pres. Leni Robredo, kanhi Sen. Antonio Trillanes, Sen. Leila de Lima, Sen. Riza Hontiveros, Sen. Franklin Drilon, Sen. Kiko Pangilinan, Sen. Ralf Recto, ug pipila ka mga kongresista, ilabina sa party-list representatives sa Macabayan bloc.
Sa kasamtangan, duna nay mga alalay sa politika nga nangahas sa pagpanaway sa administrasyon. Sama ni Sen. Dick Gordon nga niingon nga respituhan ang imbestigasyon sa Senado sa palusot sa
Sinopharm vaccine sa China. Sila si Senate President Tito Sotto ug Sen. Sonny Angara ningsuporta sa balaudnon alang sa prangkisa sa ABS-CBN.
Si Sen. Panfilo Lacson nanaway sa kurapsyon, kalangay sa bakuna ug niingon nga dili makakanselar ang Presidente sa international treaty nga Visiting Forces Agreement (VFA) kon dili mag-agi sa Senado. Sen. Nancy Binay niingon nga ipakanselar ang order sa Sinovac. Si Sen. Imee Marcos nangutana sa administrasyon kon pilay komisyon sa bakuna. Si kanhi Senate president Koko Pimentel midistansya human hulipi sa taas nga katungdanan sa Senado ug gihulipan ni Sen. Manny Pacquiao isip presidente sa PDP Laban.
Si Kanhi House Speaker Pantaleon Alvarez natandog dihang gikudeta human gikabikil ang kaubanan. Si Kanhi House Speaker Alan Peter Cayetano niporma og independent majority bloc. Si House Speaker Lord Allan Velasco miuyog sa Ubos-Balay Balauranan pinaagi sa paglahugay sa mga komitiba ug pagtandog sa mga deputy speaker. Masabtan nga ang pagsungay sa administrasyon maoy timailhan sa pagbukal na sa kawa sa politika.
Sa survey sa Pulse Asia, si Davao City Mayor Sara Duterte-Carpio maoy labing preparado nga modagan og presidente sa 2022. Hugonhugong running mate si Pres. Duterte, Bongbong Marcos, Bong Go ug Manny Pacquiao. Si Vice-Pres. Robredo ug Manila Mayor Isko Moreno maoy kusog nga tandem sa Luzon, apan hinay sa Visayas ug Mindanao. Nag-una sa Octa Research sila Duterte-Carpio.