Nganong wala pa tugoti sa hingpit ang operasyon sa fastfood chains nga moabli og 24-oras? Way dine-in. Take out service na lang sa curfew hours. Dili ba giablihan na ang turismo sa Sugbo?
Ang presentable ug limpiyo nga kan-anan nga nagtamod sa minimum health protocol importanteng kabahin alang sa pagpabalik sa pagtuyok sa lokal nga ekonomiya. Dili lang ang mga turista ang maalagaran sa kan-anan, lakip ang daghang trabahante nga panggabii.
Samtang, dili pa hinuon usab angayan nga tugotan ang ginagmayng kan-anan o pungkopungko nga makita sa sidewalk nga mohugpa kaniadto matag gabii libot sa dakbayan. Risgo tungod sa isyu sa kalimpiyo o way tino nga pagsunod sa protocol sa pandemiya.
Ang Fuente Osmeña sa uptown sa dakbayan sa Sugbo maoy naandang dapit nga sagad 24-oras ang dagkong fastfood chains. Dapit nga dangpanan sa mga gipangtugom sa lawom nga gabii o kaadlawon labi na sa mga biyahidor ug turista.
Ang lokal nga kagamhanan maayong hinayhinay usab nga motugot sa mga piniling kan-anan nga komportable ug luwas isip importanteng suporta sa lakang nga pagpahiuli sa lokal nga turismo.
Usa usab kini sa lakang nga pagtabang sa mga estabilisimento nga makabangon human sa epekto sa pandemiya. Kon magpabilin ang subrang kahigpit sa polisiya, motikyaub na gyud ang negosyo sa batakang serbisyo.
Bisan ang mga drayber sa taxi nga mag-atang og pasahero sa mga estabilismento sa Fuente Osmeña nakamatikod sa dakong kausaban sa dapit. Subra ang pagkunhod sa mga kustomer sa take our service sa mga kan-anan.
Kon magpadayon kini nga kahimtang. gikabalak-an nga ang mga tagdumala sa mga kan-anan mohukom nga mosira sa hingpit. Hinaut ibalik na ang dine-in sa 24-hour service.