Giaprubahan na sa Philippine Sports Commission (PSC) ang lineup sa sporting events nga salmutan sa Pilipinas sa 31st Southeast Asian (SEA) Games nga ipahigayon sa Hanoi, Vietnam karong Nobiyembre 21 ngadto sa Disyembre 2 karong tuiga.
Si PSC Commissioner Ramon “El Presidente” Fernandez, kinsa mao sab ang 31st SEA Games Chef de Mission, nagkanayon nga nakadesider ang sports bureau sa maong desisyon aron makasugod na sa preparasyon ang nasod alang sa pagdepensa sa overall title.
Ang Pilipinas maoy nahimong overall champion sa 30th SEA Games nga gipahigayon sa nasod niadtong Disyembre, 2019, diin milabni ang Pilipinas og 149 gold medals, 117 silver medals ug 121 bronze medals.
Ang kalampusan mao ang ikaduhang higayon nga nahimong overall champion ang Team Pilipinas sa multi-sporting event nga gisalmutan sa Vietnam, Thailand, Indonesia, Malaysia, Singapore, Myanmar, Cambodia, Brunei, Laos ug East Timor.
Tumong sa PSC nga makapreparar ang nasod og sayo alang sa pagdepensa sa titulo, mao nga ilang giaprobahan ang lineup sa sports samtang gahuwat sa pagtugot sa Inter-Agency Task Force on Emerging Infectious Diseases (IATF-EID) alang sa pagbalik sa training sa SEA Games-bound nga mga atleta.
“We will still await the IATF’s approval to formally resume, but we hope to have everything in place so we can immediately go once we get the green light,” matod sa Sugboanong 19-time PBA champion nga si Fernandez.
Ang SEA Games-bound nga mga atleta ug ubang mga miyembro sa national team puwede na nga makadawat sa allowance retroactive sa Pebrero bisan pa man ang training gilauman nga karon pang Abril magsugod.
Subay niini, mipagawas na og advisory ngadto sa managlahi nga national sports association alang sa pagsumiter sa kinahanglan nga mga dokumento alang sa retroactive allowance.
“It took a while to go through the reassessment of our more than 1,300 strong national team. We have to also follow requirements and policies since we are using government funds, but it is now done and subsequent processes have been started,” matod ni PSC Chairman William Ramirez. (RSC)