Naninda og lubi ibalhin sa 2nd floor

TANANG 14 ka mga manindahay og lubi nga namaligya sa Mandaue City Public Market ibalhin sa ikaduhang andana karong Semana Santa aron paghatag og dakong hawan alang sa mga tawo nga posibleng modugok

Kini nadesisyonan sa Mandaue City Market Authority ug ni Mandaue City Mayor Jonas Cortes aron di na masubli ang nahitabo sa miaging tuig diin nidugok ug nakapalinya og taas sa mga tawo sa mga tindahan og lubi.

Sigon ni Edgar Seno, market supervisor, nga ilang nakita nga sa miaging tuig galisod sila pagkontrolar sa mga tawo tungod kay nagdugok sa mga maninda og lubi.

Naandan na sa mga Sugbuanon nga kada Semana Santa magluto og binignit, diin usa sa sagol mao ang tunu sa lubi.

Matod ni Seno nga sa tanang mga sagol sa binignit, ang lubi dugokon tungod kay kinahanglan pa kining kudkuron hinungdan nga mokabat pag pila ka minutos una mahatag sa kustomer.

Sigon ni Seno nga ang ikaduhang andana adunay dakong hawan ug mingaw tungod kay sagad sa mga tindahan sa ikaduhang andana wa na mag-abli.

Matod niya nga ilang gitahasan ang clean and green nga kawani sa merkado nga maoy moduma sa pagpalinya sa mga kustomer nga mupalit og lubi.

Mopuno sab og pwersa ang mga kawani sa Mandaue City Enforcement Unit (MCEU) aron mapatuman gihapon ang minimum health protocols labi na nga anaa pa sa pandemya.

Sa duha ka adlaw, matod ni Seno nga temporaryong di una ipatuman ang market day aron mahatagan og higayon ang tanang residente sa Mandaue nga makapalit sa ilang sagol sa binignit.

Apan, gipasalig ni Seno nga higpit gihapon nilang ipatuman ang minimum health protocol.

Gani, anaa ang ilang mga inspector nga magsuroy suroy sa merkado aron matuman ang sumbanan. Kasamtangang, nagpatuman pa og market day schedule ang Dakbayan.

Dunay mga barangay nga makapangompra sa Lunes, Miyerkules, ug Biyernes, samtang aduna say mga barangay nga Martes, Huwebes, ug Sabado ang schedule.

Ang Mandaue City Public Market padayon gihapon sa pagpatuman sa ilang operating hours gikan sa alas 4 sa buntag ngadto sa alas 8 sa gabii ug matag sirado nila, magpahigayon og disinfection.

Alang sa mga satellite markets, gitahasan ang mga opisyal sa mga barangay nga magbutang og mga tanod, estrikto nga mopatuman sa minimum health protocol gikan sa Huwebes Santo ngadto sa Sabado Santo.

Gani, ang inspector sa Market Authority mopahigayon sab og random nga inspeksyon matag satellite market sa dakbayan aron mapatuman ang protocol labi na nga padayon ang pagsaka sa mga kaso sa Covid-19.