HOT na hot na usab karon ang Majesty Maja Salvador, hilabi na nga mobalik na kini sa teleserye matag gabii, dili sa Syete ug dili usab sa Dos kon dili sa Singko.
Tutokan na kini nato karong Abril ang pagbalik ni Maja sa primetime pinaagi sa seryeng “Niña Niño” wala pa kaayo nato masayri kon kinsa gyud ang mahimong makauban niya dinhi.
Sa mga teaser nga atong nakita mas gi-focus gyud nila og maayo ang pagbalik ni Maja Salvador.
Nunot usab niini, init sab kaayong gitubag ni Maja ang mga isyu mahitungod kaniya, una ang iyang pagbalhin nga bisan pa man og mao ni ang nahitabo karon magpabilin gihapon kining Kapamilya tungod sa pila ka tuig niya sa Dos.
Ang pag-nunot niya sa iyang tatay-tatayan nga si Mr. M, kay nakatando na kini og una sa offer kaniya.
Wala man usab kini siya’y gitaguan sa mga Big Boss niya sa Dos, nasayod man kini sila tanan sa iyang mga lakaw, hilabi na nga nahuman na ang iyang kontrata dinhi ug may pandemya pang nahitabo gawas sa pagwagtang sa prangkisa sa ABS-CBN, mangita sab gyud kini og panginabuhian.
Mao sab kini ang nahimong hinungdan nganong wala madayon ang babaye sa Kapamilya serye nga “Kahit Minsan Lang.” Mao kini ang serye nga gibalibaran ni Bea Alonzo nga maoy una unta nilang panagparesan ni Richard Gutierrez apan tungod sa pandemya ug health reasons wala kini midayon.
Si Maja ang mohulip unta kaniya apan gipapili man kini niadto kon serye ba o “SNL.”
Gitubag usab ni Maja ang isyu nga usa kini sa mga nangumbinsi sa ubang Kapamilya artist nga mobalhin sa TV5.
Daghang nangawas nga mga tsika dinhi ug may migawas pang ngalan nga Billy ug Maja ang gipasabot niini sa mga vlog nga atong nakit-an.
Naapil pa ang ngalan sa Chinita Princess nga si Kim Chiu nga daw usa sa gikombinsir nga mobalhin sa Singko.
Niadtong una nagpakahilom lang niini ang Maja pero karon hugot niyang gipanghimakak kining tanan nga dili gyud kini tinuod.
Gitubag sab niya ang mga hungihong nga lagi mahimong Kapuso artist na ang Maja, samot pa sa dihang nakita sa mga tawo ang collaboration nilang duha ni Heart Evangelista sa ilang vlog.
Nagtuo ang uban nga mahimong parti si Maja sa serye ni Heart nga “I Left My Heart In Sorsogon.”
Pero kini tanan gikataw-an lang niini, hinuon dili kini layong mahitabo kay usa ka freelance naman karon ang dalaga.
Mapasalamaton kaayo ang dalaga sa daghang mga offer kaniya, gani gikahimuot ug gikalipay niya nga daghan diay ang misalig sa iyang talento.
Pero sa pagkakaron dili kini tinuod ug mas mahimong busy kini karon sa iyang buhatong teleserye sa TV5 nga “Niña Niño” ug usa ka reality show nga programa, Ay’g Saba!