SUPERBALITA CEBU

Agianan gidugangan human pasyente giatake

ADUNA nay laing kaagian ang mga pasyente sa isolation facility sa dakbayan sa Lapu-Lapu nga nahimutang sa Hoops Dome panahon nga adunay emerhensiya.

Kini human nga gidugangan sa kagamhanan ang kaagian pasulod ug gawas sa pasilidad human sa pagkamatay sa usa ka pasyente sa coronavirus disease (Covid-19) nga giingong giatake sa kasingkasing sulod sa center niadtong Marso 19.

Ang namatay nailang si Ramon Castro, 36, taga dakbayan sa Toledo, usa ka overseas Filipino worker (OFW).

Si Castro molarga na unta sa gawas sa nasod alang sa iyang trabaho, apan nagpositibo sa Covid-19 hinungdan nga kasamtangang gi-isolate sa pasilidad sa dakbayan.

Gikatakda unta siyang ipaubos pag-usab sa swab test aron mogawas na sa isolation facility.

Samtang siya naglingkodlingkod sa iyang higdaanan kay naghuwat sa re-swabbing dihang kalit siyang natumba.

DUGAY NAKARESPONDE



Usa sa mga reklamo sa kaubang pasyente ni Castro dihang kini giatake nga dugay nga nakaresponde ang mga nurse ug medical personnel sa pasilidad hinungdan nga sila na lang ang midala sa gawas sa pasilidad pinaagi sa pagguba sa pultahan.

Didto na kini sa gawas sa pasilidad gitabang sa mga nurse nga miresponde apan nakabsan gyud sa iyang kinabuhi.

Matod ni Lapu-Lapu City Mayor Junard “Ahong” Chan nga naa ra unta duol sa pasilidad ang duty nga duha ka nurse nga naka-assign niadtong tungora.

Apan wala dayon sila makasulod sa isolation facility sanglit kinahanglan pa silang molibot sa luyo sa pasilidad kay tua ang entrance ug exit.

Kalit ra usab kaayo ang hitabo kay walay nagdahom sa kondisyon ni Castro sanglit makita sa medical record ug vital signs niini matag adlaw nga way gihambing balatian.

Ang pagbutang og dugang agianan sa pasilidad mao na untay gisugyot sa Disaster Risk Reduction and Management Office (DRRMO) human sa ilang pakigpulong sa mga pasyente niadtong Marso 18, apan naunhan sa kalit nga hitabo, sumala sa mayor.

“Wala gyuy pagkuwang, disgrasya gyud ang hitabo. Di gyud nato matag-an ug ang tawo kanus-a siya mag heart attack. Wa gyud ta, di gyud ta katag-an. Wa ta magdahom nga duna siyay problema sa kasing-kasing kay pagsulod niya asymptomatic man siya dili man siya ingon nga naa siyay difficult breathing,” pasabot ni Chan.

Gawas sa dugang agianan gidugangan na usab og 20 ka nurse ug medical personnel ang pasilidad aron masigurong adunay makaatiman sa mga pasyente.

Mipasalig usab ang Kagamhanan nga moabaga sa pagpalubong ni Castro ug paghatod niini sa iyang pamilya sa dakbayan sa Toledo.

VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph