ANG Cebu City Jeepney Task Force (JTF) nihangyo kang Cebu City Mayor Edgardo Labella sa pagbukas sa tanang mga rota sa traditional public utility jeepneys (TPUJs) sa siyudad.
Sa usa ka suwat ni Cebu City Councilor James Anthony Cuenco ngadto kang Labella gipetsahan og Marso 16, 2021, si Cuenco nisuwat nga niadtong Disyembre 7, 2020, usa ka assessment meeting ang gihimo sa pag-assess sa Balik Pasada Program sa siyudad.
Gitambungan ang tigom ni Land Transportation Franchising and Regulatory Board (LTFRB) Central Visayas director Eduardo Montealto Jr., mga representante sa Cebu City Transportation Office (CCTO), ug sa traffic enforcement unit sa Cebu City Police Office (CCPO).
Atol sa tigom, si Cuenco, kinsa nangu sa JTF, niingon nga si Montealto nirekomendar sa subling pagbukas sa tanang mga rota sa siyudad.
“During the same meeting, the LTFRB, through the Regional Director Col. Eduardo C. Montealto Jr. recommended the opening of all Cebu City intra-city routes in order to address the increasing demand for public transportation,” sulti ni Cuenco sa iyang suwat.
Matod niya nga kini nahitabo tungod sa pagbukas sa mas daghang mga establisemento ug dugang mga trabahante ang nang-report.
Sa pagkakaron, ang Kagamhanan sa Siyudad nibukas sa 37 ka mga rota sa mga TPUJ sukad sa Oktubre, apan naa lang sa kapin 400 pa ka mga sakyanan ang nabalik sa pagpamasahero. Sa 37, siyam ka mga rota ang alang sa inter-city TPUJs gikan sa mga Siyudad sa Mandaue ug Talisay.
“In the aforementioned meeting, the Balik Pasada Program was assessed to generally performing well, with no TPUJ unit or driver apprehensions from our law enforcement and traffic agencies,” dugang niCuenco.
Usa kini sa mga rason nga girekomendar ang pagbukas og dugang mga rota sa TPUJ.
Si Cuenco niingon nga sukad sa Oktubre dihang gitugtan sa pag-operate ang mga TPUJ, daghan ang nang request nga mga TPUJ driver ug operator sa subling pagbukas sa ilang mga rota.
Sa nanglabay nga mga interview, si Labella niingon nga iyang tan-awon ang mga sugyot sa JTF. (JJL)