SUPERBALITA DAVAO

Genoguin: Kuwalipikasyon sa pagka-presidente

Kontra Balanse

BIYAAN ta usa ang paghisgot sa mga biktima sa pandemic Covid-19 kay puol kaayo kon kada adlaw mag-ihap ta kon pila ang nagpositibo ug pila ang nangamatay niining kalibutanong kagaw nga mikutlo na'g daghang mga kinabuhi sa tibuok kalibutan.

Ari ta maghisgot sa politika, kay mao ni ang mainit nga isyu karong panahona. Ang mga politiko kanunay kunohay ngpahimangno nga dili usa mamolitika kay unahon ang tabang ngadto sa katawhan nga biktima sa pandemya.

Sama kang Senador Manny Pacquiao nga gitiradahan ang vice chairman sa Partido Demokratiko Pilipino–Lakas ng Bayan (PDP-Laban) nga si Energy Secretary Alfonso Cusi, nga nagsuroy suroy na sa Visayas aron mangalap kuno og pirma nga padaganon si Presidente Rodrigo Roa Duterte sa pagka- bise presidente inigkahuman na sa iyang termino karong Hunyo 30, 2022.

Pero ang tinuod, ang mga miyembro sa PDP-Laban mao ang mipirma ug nagduso sa resolusyon nga padagan og bise presidente, bisan kinsa ang kandidato sa PDP-Laban sa pagka-presidente, si Mayor Sara Duterte-Carpio ba o si Senador Christopher Bong Go.

Pero ang pangutana dinhi nganong masuko man si Manny Pacquiao nga presidente man ang iyang daganan ug dili man bise-presidente?

Matud pa ni Pacquiao, "Tulong muna sa ating mga kababayan ang unahin natin, huwag muna 'yong politika kasi kawawa ang ating mga mamamayan na biktima sa pandemic Covid-19."

Pero didto sa iyang probinsiya sa Saranggani ug pipila ka dapit sa probinsiya sa Davao del Sur, adunay mga tarpaulin nga may tatak "MANNY PACQUIAO FOR PRESIDENT MOVEMENT" ug nagbuhat na og POLITICAL JINGLE kang Freddie Aguilar gamit ang himig sa "ANG BAYAN KONG PILIPINAS".

Unsa ba ang kuwalipikasyon nga modagan sa pagka-presidente? Sa atong batakang balaod, tulo lang ka punto nga ikaw Filipino citizen sa edad nga 40-anyos, mahibalong mobasa ug mahibalo nga mosulat? Ug kini anaa kang Pacquiao.

Pero alang sa mga matitino ug bright nga mga botante, dili lang diha kutob ang atong panglantaw ug pagkilatis sa mamuno sa atong nasud kay pinakataas kini nga posisyon? Ug ang mga disisyon dinhi, dili puwedeng isalig na lang nimo sa imong mga ADVISERS?

Kitang tanan nasayud nga dili kini haum kang Pacquiao? Kay kon naglisud si Presidente Duterte sa kadaghang problema sa atong nasud nga usa ka abogado ug may taas nga kasinatian sa posisyong EXCECUTIVE, si Pacquiao pa ba nga Alternative Learning System (ALS) lang intawon ang naabot?

Wala kita giubsan sa kakayahan ni Pacquiao pero kitang tanan adunay limitasyon. Kon sa boxing, saludo ug luhod kitang tanan kang Manny. Pero sa pagka-presidente hinaut nga makita ni Manny kon asa ra siya kutob ug iyang dawaton ang kamatuoran nga dili siya angayan sa pagka-presidente.

Daghan kita'g gidayeg ug gipasidunggan kon sa natad sa isports na ang hisgutan? Sama kang Efren (Bata) Reyes kinsa kampeyon sa natad sa billard. Apan dili unta i-convert sa politika. Aw, puwede sa ubos nga posisyon. Kon motabang si Manny sa mga kabus nga walang-wala, intawon puwede na niya himuon. Pero kon ang atong kasikat sa pagka-boksingero atong i-convert sa pagka-presidente, that's another story. LAYO RA'S TINUOD MANNY!


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph