MOKABAT sa 50 ka mga batang trabahante sa Davao del Sur ang gitabangan sa Department of Labor and Employment (DOLE) sa Davao Region niadtong Biyernes, Marso 19, 2021.
Pinaagi sa pakig-alayon sa DOLE sa ilang mga partner agencies ug stakeholders, mga child laborers nga gilista sukad niadtong 2018-2019 sa mga lungsod sa Magsaysay, Hagonoy ug Digos City, nakadawat og ayuda alang sa mga bulan sa Pebrero ug Marso dihang gilusad ang "Project Angel Tree" activity.
Ang maong aktibidad, ilawom sa DOLE Child Labor Prevention and Elimination Program, nagtinguha nga makatabang sa mga child laborers ug sa ilang pamilya.
Tungod sa hulga sa pandemya, mismong ang mga ginikanan ug guardians ang midawat sa mga bags nga adunay sulod nga grocery items, school supplies, sinina, duwaan ug uban pa.
Gipasalamatan ni DOLE Regional Director Ofelia B. Domingo ang ilang mga kaabag ug stakeholders nga way puas nga misuporta sa maong programa. (Orlando B. Dinoy)