NITAMBONG ko og usa ka reunion nga gitambongan sa mga lumad nga taga Dumingag, Zamboanga del Sur nga nia na sa Sugbo manimuyo ug nanginabuhi. Gihimo kini tibuok adlaw niadtong Sabado, Marso 20, sa usa ka resort sa bukid. Nindot ang maong dapit kay gawas nga presko ang hangin, nag-umbaw sa mga dakbayan sa Sugbo, Mandaue, ug Lapu-Lapu, lungsod sa Cordova ug probinsya sa Bohol ang maong dapit.
Sa usa ka bahin sa programa, ang participants gihatagan og higayon nga makapaambit sa ilang mga kasinatian nganong napadpad sila sa Sugbo. Sila si Noling Caballero, Fredo Castillo ug Jimmy Duhaylungsod nihisgot giunsa nila pagsungasong ang kalisod sa ilang pagpanimpalad sa Sugbo sulod sa dugay nang katuigan. Si Noling nisulod pagka traffic enforcer sa Cebu City Transportation Office niadtong tuig 2000 hangtod karon human mabalhinbalhin sa nagkadaiyang trabaho. Si Fredo naminyo og taga City of Naga ug nagtukod og gamay nga tindahan.
Samtang si Jimmy nanginabuhi pinaagi sa pagpangasal og baboy. Matod niya, gikaloy-an siya sa Ginoo kay daghan na siya og suki kay gawas nga lami ang timpla, tinarong nga presyo nga way bunal sukwahi sa gibuhat sa uban ug way narik nga gikalagutan sa daghang biktima.
Ang ilang mga sugilanon way kalainan sa kasinatian sa ilang mga paisano. Ang uban pinaagi sa bulig sa masyong kapalaran, nakapahuman og paeskwela sa ilang mga anak. Ang uban nga professionals na, naghupot og mga dagkong katungdanan sa private ug government sector. Sama kang Brig. Gen. Mafe Bazar, deputy regional director for administration sa Police Regional Office (PRO) 7, nibiya sa Dumingag nga usa ka yanong tinun-an gikan sa yanong pamilya sa Upper Labding, Dumingag. Bawon ang kugi ug determinasyon sa Philippine Military Academy, siya nisangko ug human sa daghang pagsulay ug giyera nga naapilan sa dihang nigradwar ug nisud sa Philippine Constabulary, karon usa na siya sa mga haligi sa PRO 7.
Sa iyang mubo nga mensahe, iyang gidasig ang iyang mga paisano nga sa kanunay motuman sa balaod. Hinuon iyang gipasalig nga sa kanunay naa siya sa ilang kiliran kon ang ilang katungod mao nay abusohan. Tungod sa iyang gugma sa iyang tagi lungsod, sa hilom, siya maoy nangusog ug nitampo og dakong pahat aron mapahigayon ang maong reunion.
Si Ma’am DozyL Campomanes dela Peña sa Department of the Interior and Local Government (DILG) 7 nagsilbi nga kaabag ni Gen. Bazar sa maong misyon. Sa usa ka bahin sa programa, si Gerry Paglinawan nipaambit sa iyang organic products nga gitawag og Agriko ngadto sa iyang mga paisano. Human maapuri ang tanan, usa ka pahibalo ang iyang gihimo nga nakapaukay sa mga nanambong. Kini mao ang iyang pagpaila sa ilang paisano nga may tumor sa tuo nga mata. Si Ariel Magbanua Anoos bag-o lang naabot gikan sa Dumingag aron magpatambal. Way daghang langas, ang mga nanambong nag-iyahay og kuot aron masuportahan ang panginahanglan ni Ariel. Gamay ra ang P12,158 nga natampo sa reunion para sa iyang operasyon, kahilakon si Ariel nga nagpasalamat sa gasa sa kalooy, sanglit wa siya magdahum nga may mga tagi lungsod nga nagpabakabana sa iyang sitwasyon.
Pait kining gidangatan ni Ariel, kay namatay iyang asawa sa miaging Agusto tungod sa cancer sa atay, ug may lima pa siya ka anak nga buhion. Kadako og matabang kon magkatapok og mag-ilhanay ang mga paisano. Pipila sa akong mga nahimamat didto mao ang pamilyang Micaros, Mouelic, Jayag, Lanorias, Sabuero, Alia ug Santa Ana. Sa mga nilingkod nga officers, congratulations!