TARGET sa gobyerno nga makab-ot sa Pilipinas ang gitawag nga herd immunity batok sa Covid-19 karong tuiga, uban ang panghinaut nga magsaulog ang mga Pilipino sa usa ka “better Christmas.”
Si vaccine czar Carlito Galvez Jr. niingon nga makab-ot ang herd immunity kon mabakunahan ang 50 ngadto sa 70 ka milyon ka mga Pilipino. Ug mahitabo lang kini kon aduna nay “stable supply” sa mga bakuna batok sa Covid-19.
Kay wa pay stable supply sa bakuna, giuna pagbakuna ang health workers, matod niya. Kon duna nay stable supply sa bakuna, bakunahan ang upat ka milyon kada buwan sugod sa Abril. Kon imong kwentahon, sa usa ka tuig, 48 ka milyon ray mabakunahan.
* * *
Ang dakong pangutana karon mao kon hain na ang bakuna, sama sa pangutana ni Senador Panfilo “Ping” Lacson nga nag-ingon, “Nasaan ka bakuna?” Ang ubang mga nasod nakabakuna na hangtod sa katunga sa ilang populasyon.
Nakapangutana si Lacson nganong nadugay ang pagpamalit og bakuna sa gobyerno nga duna may P126.75 ka bilyon nga pundo alang niini. Dugang pa niya, “Unless some drastic and innovative steps are undertaken, we might all die waiting.”
Sama sa estorya ni kanhi Senador Juan Flavier sa usa ka lalake didto sa Bicol nga gibuwagan sa uyab.
Nakahukom siyang magpaligis sa tren. Nihigda siya sa riles. Apan namatay na lang siya sa uhaw, gutom ug kainit sa pagpinaabot sa tren kay wa na diay mobiyahe ang tren padung sa Bicol niadtong panahona.
* * *
Hinuon ang bakuna batok sa Covid-19 di sama sa tren nga wa gyud moabot sa estorya ni Flavier, nga kanhi usa ka health secretary. Kay matod pa ni Galvez, ang gobyerno nakaseguro nga nga makapalit og 108 ka milyon ka doses sa mga bakuna gikan sa lain-laing manufacturers.
Apan kinahanglan nga kombinsihon ang kadaghanan nga magpabakuna sa panahon nga moabot na ang mga bakuna alang sa dili frontliners aron makab-ot ang herd immunity.
Hinumdumi, daghan gihapon ang mahadlok sa injection, mahadlok gani kon makakita lang og dagom.