DUNA bay dakong posibilidad nga ibalik sa general community quarantine (GCQ) ang Cebu, lakip ang tulo ka mga dakbayan--Cebu, Mandaue ug Lapu-Lapu--kon magpadayon og saka ang numbero sa mga natakdan sa Covid-19? Morag dili kalikayan nga mahibalik ta sa GCQ kon yaya ang pagpatuman sa health protocols ug ang kadaghanon kanato magpadayon nga gahi’g ulo.
Sugod Marso 22, 2021 hangtod sa Abril 4, 2021, ang Metro Manila lakip ang Probinsya sa Bulacan, Cavite, Laguna ug Rizal gibalik sa GCQ tungod sa kapin sa 7,000 nga natakdan sa Covid-19 sulod sa tulo ka adlaw. Ang Probinsya dunay 1,577 ka aktibo nga kaso, ang Cebu city 2,508, Mandaue 1,114 ug Lapu-Lapu 1,062, matod sa DOH-7 case bulletin niadtong Marso 21, 2021.
Dihang girekomendar ang Cebu nga ibalik sa GCQ basi sa usa ka survey kay misaka ang kaso sa mga naigo sa Covid-19, labina dinhi sa Dakbayan sa Sugbo, merebentar dayon si Cebu Gov. Gwen Garcia kay matod pa niya ang pobre mosamot ka pobre. Ubos sa GCQ ang mga negosyo nga gitawag nga non-essential, lakip na niini ang turismo, masirad-an man.
Di gyud mosugot si Gobernador Gwen mahibalik ang Cebu sa GCQ tungod kay iya na man nga gisugdan og abli ang turismo sa probinsya. Apan kon mahitabo gyud nga mosaka ang gidaghanon sa mga matakdan sa coronavirus unya morekomendar ang IATF ngadto ni Presidente Duterte nga ibalik sa GCQ ang tibuok Cebu, duna bay mahimo ang mga lokal nga opisyales sa pagpugong sa orden unya ni Presidente Duterte?
Ang mga opisyal sa barangay gitahasan na sa pagpatuman sa health protocols sa tarong nga pagsul-ob sa mask ug face shield ingon man social distancing kon naa sa publiko. Apan basi sa akong nakita, daghan man gihapon ang hambugero nga dili motuman sa husto nga pagsul-ob sa mask ug face shield.
Sa tiyangge sa Danao city niadtong Biyernes, dihang namalit ko’g isda, ang tanan nga mga naninda walay mask. Igo ra nga mipahiyom ang usa ka tindera nga akong gipangutana ngano wala siya magsul-ob og mask ug face shield. Ang lain tindera miingon nga mosul-ob siya sa mask igpauli sa ila. Susmaryosep!
Ang mga naninda og pagkaon, utanon ug uban pa sa kilid sa dalan H. Abellana, Mandaue city duna man tuoy mask, apan kutob ra sa ilang suwang ug walay face shield. Ingon ana sad ang mga naninda sa mga merkado sa barangay sa Cebu City. Ang ilang mask naa ra sa ilang suwang kay maglisod kuno sila og ginhawa dihang akong gisita.
Way usa ka Sugboanaon, labina sa mga negosyante, nga mosugot nga ibalik ta sa GCQ tungod kay naghinayhinay na man og bangon ang atong ekonomiya ug daghan na ang nakabalik sa ilang trabaho pag-abli sa mga non-essential nga industriya. Igo ba lang mobabag ang atong lokal nga opisyales kon ibalik sa GCQ ang tibuok Cebu, apan way kusganon nga gibuhat aron sa pagpatuman sa health protocols?