Kadagkuan sa simbahan sa Sugbo nakahukom nga wa nay ipahigayon nga Visita Iglesia atol sa paghandum sa Semana Santa.
Kini maoy gi-anunsiyo ni Fr. Mhar Balili sa Achdiocese of Cebu, kagahapon, Marso 23.
Nipasabot si Balili kini may kalabutan sa nagkataas nga kaso sa nataptan sa coronavirus disease (Covid-19) dili lang sa Sugbo apan lukop nasud.
Matod pa nga dili makaako ang simbahan sa maong risgo ilabi na nga ang Archdiocese nangandam sa kasaulogan sa ika-500 Years of Christianity nga magsugod sa Abril 4.
Tradisyon sa mga Katoliko ang mohimo og Visita Iglesia atol sa Semana Santa nga moduaw dili momenos pito ka mga nagkadaiyang simbahan atol sa Huwebes Santo ug Biyernes Santo aron sa pagpahinungod og pag-ampo atubangan sa Blessed Sacrament sa matag simbahan.
Samtang, sugdan sa Lunes Santo, Marso 29, ipaubos sa Cebu City Police Office (CCPO) sa full alert status ang dakbayan aron sa paghatag sa hugot nga seguridad sa semana santa.
Gipahibawo ni Police Colonel Josefino Ligan, hepe sa CCPO, nga tanang pulis sa dakbayan ang gipa-report sa maong adlaw ug wala nay gitugotan nga maka-leave sa ilang trabaho.
Nagpasabot kini nga ang tanang personnel anaa sa ilang tagsa-tagsa ka police station ug andam nga ipakatap bisan unsa nga oras.
“For the whole Cebu City Police Office ang atoang security personnel PNP uniformed men will be on full alert status,” matod ni Ligan.
Usa sa tutokan og bantay sa kapulisan ang mga pantalan ug bus terminal.
Sa laing bahin, usa ka closed-door Chrism mass ug renewal of vow sa kapari-an ang gipahigayn sa Cebu Metropolitan Cathedral, kagahapon, Marso 23.
Si Arsobispo Palma sa iyang homily mipadayag sa iyang pasalamat nga taliwala sa pandemiya gihatagan sila og kahigayonan nga makapahigayon sa maong kalihokan uban sa mga kaparian sa Sugbo. (WBS, AYB)