NAGPAHIMANGNO karon sa City Disaster Risk Reduction and Management Office (CDRRMO) nga likayan una sa mga bikers ang pag-adto sa Mandug-Acacia Bypass Road sa Purok Sto. Niño, Barangay Mandug, Davao City sanglit humok ang yuta gumikan padayon ang gihimong road construction.
Una niini, pasado alas 7 kagahapon sa buntag, Marso 23, midahili ang porsiyon sa kalsada diin subay sa mga testigo, dunay tulo ka mga tawo ang aksidente nga natabunan.
Gilayong miresponde ang mga tawo sa dapit diin naluwas ang usa ka babaye ug daling gidala sa Southern Philippines Medical Center (SPMC).
Dali sab nga miabot ang mga rescuers ug ang Urban Search and Rescue team sa Central 911 ug gilayong mihimo og search and retrieval operation.
Alas 12 sa udto, nakalutan ug wala nay kinabuhi ang usa ka lalaki nga si Harvey Mar Cipriano Panes, taga Trento, Agusan del Sur.
Subay niini, gikompirma ni Rodrigo Bustillo, ang Operations and Warning officer sa CDRRMO sa Davao City, nga tulo ka tawo ang gituohan nga na-trap sa midahili nga yuta.
Kini gibutyag sa opisyal alas 11 kagahapon samtang nagpadayon ang gihimong clearing ug retrieval operations sa lugar.
Ang lugar nahimong adtoanan sa mga bikers sanglit overlooking ang maong dapit.