Sa ikaupat nga semana matag Marso gisaulog nato ang Protection and Gender-Fair Treatment of the Girl Child Week.
Ang matag tuig nga kasaulogan alang sa mga batang babaye nakalatid sa Presidential Proclamation No. 759 nga gipirmahan ni kanhing pangulo sa Pilipinas nga si Fidel V. Ramos niadtong 1996 o 25 na ka tuig ang milabay.
Subay sa maong proklamasyon, kinahanglang mahatagan og mga kahigayunan ug pagpanalipod ang mga batang babaye aron maandam sila sa ilang papel sa pagpalambo sa ilang mga komunidad.
Niadtong gihimo ang Presidential Proclamation, duna nay pag-ila sa pait nga kahimtang sa mga batang babaye human nasayran nga nagkasaka ang insidente sa mga batang babaye nga nahimong biktima sa economic exploitation, prostitusyon, ug sekswal nga pagpangabuso.
Gawas sa maong kasinatian, nasayran sab ang mga kaso sa teenage pregnancy ug pagkasakit tungod sa Human Immunodeficiency Virus (HIV) ug Acquired Immunodeficiency Syndrome (Aids).
Ang pagpanday sa maong proklamasyon usa ka reaffirmation sa Pilipinas sa iyang pagsunod sa mga kasabutan sa global initiatives nga gisalmutan ini.
Apil sab kini sa lakang nga gihimo sa estado aron mapatuman ang mga plano ug proyekto sa 1995-2025 Philippine Plan for Gender-Responsive Development.
Mando sa proklamasyon nga kinahanglan buhaton sa Department of Social Welfare and Development (DSWD) isip lead agency inubanan sa Council for the Welfare of Children (CWC) ang pipila ka mga importanteng tahas sama sa pag-review sa mga programa sa gobyerno alang sa mga batang babaye, pagsugyot ug mga kausaban sa mga balaod nga nagdiscriminate sa mga batang babaye, ug paghimo og information campaigns aron mapasiguro nga dunay equal opportunities ang matag batang babaye.
Gimanduan sab ang ubang departamento ug ahensya sa gobyerno sa pag-assist ug coordinate sa DSWD ug CWC sama sa Department of Interior and Local Government (DILG), Department of Labor and Employment (Dole) ug Philippine National Police (PNP) sa pagkab-ot sa mga tumong ug tinguha sa kampanya alang sa mga girl child.
Bisan pa man sa pagpakanaog ining proklamasyon sa pagsaulog sa Girl Child Week, dili malimod nga kinahanglan pa nga doblehon ang pagpaningkamot alang sa kaugmaon sa atong mga batang babaye.
Subay sa research nga gihimo sa Save the Children (The Hidden Impact of Covid-19 on Child Protection and Well-Being), nahibaw-an nga usa sa matag unom ka mga bata ang nakasinati ug pagpangabuso sulod sa ilang panimay atol sa Covid-19 pandemic.
Mipagawas sab og datos ang mga nasudnong ahensya nga misaka ang mga kaso sa mga gender-based violence (GBV) diri sa Pilipinas niadtong sinugdanan sa pagpatuman sa community quarantine sa miaging tuig.
Kinahanglan sab nga ma-amyendahan ang child protection laws aron mapalig-on kini sa pakigbatok sa pagpanghimulos sa batang babaye sama sa Anti-Rape Law ug Anti-Trafficking in Persons Act.
Gawas sa gobyerno, kinahanglan nga mangilabot ang pribadong sektor ug publiko sa pagpanalipod sa mga batang babaye.
Kon dunay mga insidente sa pagpangabuso sa mga batang babaye sa inyong dapit, mahimo kamo nga mangayo og tambag sa CLB pinaagi sa pag-abli sa Children’s Legal Assistance Forms--alang sa mga criminal cases: tinyurl.com/clbcrimeform ug alang sa mga civil cases: tinyurl.com/clbcivilform.
[Lindog sinuwat ni Atty. Joan Saniel-Amit, executive director, inubanan sa mga abogado sa Children’s Legal Bureau sama nilang Jenny Vieve Cabradilla ug King Anthony Perez. Mahimo kamo nga mopadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]