Editoryal: Carbon Market

Editorial cartoon by Ariel Itumay
Editorial cartoon by Ariel Itumay

GIPADAYAG sa Cebu Market Vendors Multi-Purpose Cooperative (Cemvedco) ang ilang pagsupak sa pagpalambo sa kahimtang sa Carbon Public Market, ang pinakakaraan ug pinakadako nga merkado sa dakbayan sa Sugbo.

Kini human nga ang SM Supermarkets misumiter na sa ilang proposal ngadto ni Mayor Edgar Labella nga bag-uhon ug i-modernize ang Carbon market ngadto sa usa ka supermarket sama sa ilang gibuhat sa SM Marketmall sa Dasmarinas, Cavite.

Apan ang chairman sa Cemvedco nga si Erwin Gok-ong Sr. mipasabot nga dili sila gusto sa setup nga gipasunod didto sa Dasmarinas, Cavite. Kini sigon sa ilang naobserbahan atol sa ilang pagbisita sa maong dapit.

Iyang gisaysay nga ang mga vendors mediyo nahimutang sa sudlonon nga habig, samtang ang mga opisina sa mga manager ug mga pribadong buhatan maoy unang makita sa mga mangumprahay.

Lain nilang gikabalak-an mao nga tingali og motinda usab ang SM og produkto nga susama ra usab sa ilang gitinda ug kuyaw kon mas mobarato pa unya sa ila.

Dunay mga balidong punto ang Cemvedco nga angay hatagan og pagtagad sa mayor ug sa SM management.

Apan wa kini magpasabot nga kini maoy himuong rason aron pakgangon ug babagan ang pagpalambo ug pagpa-mordernize sa merkado.

Kinahanglan, ilhon ang mga lagda nga dili haom nga ipasunod. Ihikyad ang win-win solution sa matag habig aron nga walay mabintahaan.

Kinahanglan nga adunay kausaban nga mapasunod tungod ug alang sa kalambuan sa tanang naapektuhan.

Kon unsay nakuhang leksiyon sa pagbisita sa mga Cemvedco officials sa Dasmarinas, Cavite kini maoy ilang gamiton pag-ila kon unsay dili o angay nga ipasunod aron makab-ot ang katuyo-an. Kay kon dili karon, kanus-a pa man?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph