WALA makaabot og 10 ang bag-ong kaso sa coronavirus disease (Covid-19) sa Cagayan de Oro human walo ra ka mga residente ang mipositibo sa virus, sumala sa report sa City Health Office sa dakbayan.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 4,024.
Sumala ni City Health Officer Dr. Lorraine Nery, sa walo ka mga bag-ong lokal nga kaso, usa niini ang locally stranded individual (LSI), tulo ang mga local cases with link, ug upat ang mga local index nga mga kaso.
Sa 4,024 nga kinatibuk-ang kaso sa Covid-19 sa syudad, 425 ang mga returning overseas Filipino workers/locally stranded individuals (ROFs/LSIs) ug 3,599 ang mga local transmissions.
Matud ni Nery, sa 3,599 nga mga local nga kaso, 189 ang mga persons deprived of liberty (PDLs), 1,924 ang mga local index cases, ug 1,484 ang mga local cases with link.
Ang Cagayan de Oro adunay 144 ka mga active cases, 41 niini na-admit sa Northern Mindanao Medical Center ug uban pang mga ospital sa syudad, 100 ang mga outpatients, ug tulo ang mga ROFs/LSIs.
Nakatala usab og 24 ka mga Covid-positive nga mga kaso nga karon naka-recover. Anaa na karon sa 3,689 ang ihap sa mga nakarekober nga mga kaso sa dakbayan.
Sa maong numero, 302 ang mga LSIs, 119 ang mga ROFs, ug 3,268 ang mga lokal nga kaso (community: 2,761; Apors: 507).
Ang recovery rate sa Cagayan de Oro anaa na sa 91.67 percent.
Ang ihap sa mga namatay sa Covid-19 sa syudad naa sa 191.