STA. CRUZ, Davao del Sur - Baynte sais (26) ka mga drayber ang nasikop atol sa implementasyon sa "One Time, Big Time" nga operasyon sa kapulisan niadtong Martes, Marso 23, 2021.
Gibutyag ni Major Crisaldo Gaila, hepe sa Sta. Cruz Municipal Police Station, nga sagad sa mga nadakpan, milapas sa Republic Act 4136 kun Land Transportation Code of the Philippines.
Sugod alas 8 sa buntag, nagmuntar na og checkpoint ang kapulisan, kalaayon sa mga sakop sa Highway Patrol Group ug Traffic Management Center.
Apil sa gipatuman sa mga awtoridad ang "road discipline" mao nga nasakpan ang mga drayber nga nagpadagan sa ilang mga sakyanan nga way pertinenteng dokumento.
Ni Gaila, pipila sa mga nakamulta mao ang mga drayber nga nagmaneho nga wala magdala sa original receipt, certificate of registration ug wala sab lisensiya.
Nagpasidaan sab si Gaila sa mga drayber nga di mogamit og bora-bora nga mga tambutso aron di matanggong ang ilang motorsiklo. (Orlando B. Dinoy)