GIKAKURAT sa usa ka ulitawo nga dunay nagtaop nga kutsilyo sa iyang lawas sulod sa usa ka tuig.
Giila ang biktima nga si Kenth Ryan Tomao, 25, ulitawo ug nagpuyo sa Barangay Amazion, Kidapawan City.
Sumala sa biktima nga mag-aplay unta siya og trabaho sa usa ka mining company sa Agusan del Sur.
Usa sa mga kinahanglanon niini mao ang x-ray result, police clearance ug health certificate.
Atol nga nagpa-x-ray si Tomao, nadiskubre nga dunay nagtaop nga kutsilyo sa iyang likod nga bahin.
Asoy sa ulitawo nga niadtong Enero 4, 2020, nadunggaban siya sa Dayao Street, Barangay Poblacion sa nahisgutang siyudad human natripingan sa mga hubog.
Nadala siya sa pampubliko nga balay tambalanan sa North Cotabato ug gitahi ang iyang samad.
Apan wa madiparahe nga naputol diay ang kutsilyo gikan sa iyang pul-an nga gidunggab kaniya ug nahibilin sa lawas.
Nanawagan ang biktima sa mga personahe sa ospital ug sa doktor nga nagtahi sa iyang samad nga siya matabangan nga makuha ang kutsilyo sa iyang lawas.
Daghan sab ang nagsugyot sa biktima ug sa iyang pamilya nga magpasaka og tukmang kaso batok sa doktor nga nagtahi sa iyang samad dinunggaban.