GIKASOHAN na sa korte ang lalaki nga nagpailang sakop sa National Bureau of Investigation (NBI) nga nasikop atol sa entrapment operation didto sa Crocodile Park, Diversion Road, Davao City.
Nasikop ang suspek nga si Matias Canque Relacion, hamtong ang pangedaron, pinaagi sa hiniusang puwersa sa Talomo Police Station ug sa Criminal Investigation and Detection Group-Davao City Field Unit (CIDG-DCFU) nga gipangunahan sa hepe niini nga si Police Major Milgrace Cajes Driz.
Una niini, dunay reklamo nga gipaabot sa CIDG-DCFU hinungdan nga gikasa ang entrapment operation.
Dihang giposasan ang suspek, nakumpiska sa posisyon niini ang armas nga Ingram sub machine gun, .38 revolver, mga magazine, mga bala, unom ka mga ID sa NBI, badge, ug reflectorized vest, samtang nakumpiska sab ang sakyanan sa suspetsado nga maoy gigamit sa transaksiyon.
Kasong pagsupak sa Republic Act 10591 kun Firearms and Ammunitions Law ug Article 177 sa Revised Penal Code kon Usurpation of Official Function ang ipasaka nga kaso batok sa dinakpan didto sa korte. (Jeepy P. Compio)