MALAMPUSON ang gipahigayong bomb drills kagahapon sa buntag, Byernes, Marso 26, nga gipangunahan sa Task Force (TF) Davao uban sa koordinasyon sa nagkadaiyang yunit sa awtoridad ug sa mismong lokal nga panggamhanan sa Davao City.
Dako ang pasalamat ni TF-Davao Commander Colonel Consolito Yecla sa kooperasyon sa katawhan diin asa gihimo ang laing hugna sa security and anti-terrorism community exercise.
Sumala sa opisyal nga tumong sa exercise aron nga maandam ang katakus sa seguridad ug sa mga safety responders, ingon man ang publiko kung dunay matigayon nga kasamok nga hinimoan sa teroristang grupo.
Atol sa exercise, gipakita ang kahanas sa mga safety responders ngadto sa pag-depyos sa gikatahapang butang ug ang pagluwas sa mga biktima.
Sa senaryo, human sa pagbusikad sa bomba sa may Ecoland ug Bankerohan Public Market, makita nga dunay mga nagkadugo nga biktima ug kung paunsa kini giluwas sa mga responders nga unang miabot sa crime scene.
Bisan miguot ang dagan sa trapiko atol sa aktibidad, apan misabot ang kadaghanan sa Dabawenyo sanglit alang kini sa kaluwasan sa tanang nagpuyo sa siyudad sa Davao.
Sa kinatibuk-an, dako ang pasalamat sa TF-Davao human nakuha ang taas nga grado sa assessment sa maong aktibidad. (Jeepy P. Compio)