‘Drug lord’ mipiyansa, gipatay

Gikatahapang drug lord nga gipiyansahan sa iyang mga igsuon kay giingong himatyon na sa cancer sa baga namatay human gi-ambush alas 11:20 sa buntag sa Biyernes sa national highway sa Barangay Don Virgilio Gonzalez, lungsod sa Medellin, amihanang Sugbo.

Si Reynaldo Batad Arcenal 48, alias “Rey Siga,” minyo, negusyante, taga Barangay Hagnaya, lungsod San Remegio natusaktusak sa mga bala ang ulo hinungdan sa hinanaling kamatayon.

Si Arcenal gihulagway sa pipila ka mga police official nga ka level ug kadungan nila ni anhing Central Visayas drug lord Jeffrey “Jaguar” Diaz ug kaubanan.

Si Arcenal lumad nga taga dan A. Lopez, sityo Baho, Barangay Calamba, Dakbayan sa Sugbo.

Si Police Master Sgt. Raymon Pepito, imbestigador sa Medellin Police Station nga nahinabi sa Superbalita Cebu, nagkayon nga si Arcenal gikan sa Bureau of Jail Management and Penology (BJMP) jail sa Medellin human nabilanggo sulod sa siyam ka tuig gumikan sa kaso sa illegal nga drugas.

Ang iyang half brother nga si Joel Batad, 65, minyo, retired teacher, taga Simala, Sibonga maoy nagmaniho sa Innova nga gipanag-iya sa biktima.

Matod ni Pepito, nga human gipiyansahan, nakuha sa pamilya ang court order sa korte sa dakbayan sa Bogo ug gikuha si Reynaldo sa iyang pamilya.

Nisulti si Batad nga pito silang sakay sa Innova, duha niini ang 9 ug 16 anyos nga mga anak ni Reynaldo.

Si Reynaldo gipalingkod sa tunga, gipatung-an sa iyang half sister nga si Maria, anak nga duha ka menor de edad, mga pag-umangkon nga 14 ug 15 anyos.

Samtang nagsubay sila sa national highway, kalit lang nibabag ang puti nga Nissan Navarra.

Usa ka armado nga lalake nikanaug ug niduol kang Batad, nimando kaniya nga modapa sa manobela.

Lakip sa gipadapa ang iyang mga pag-umangkon ug igsuon dayon sunod-sunod nga buto sa armas.

Human sa butobuto, nakakita siyag labing minos upat ka armadong mga tawo nga nag-bonnet nga nagtuyok sa ilang sakyanan.

Lakip sa iyang nakita ang laing sakyanan diha sa likod nga duna say mga sakay.

Gumikan sa iyang kahadlok, wa na siya makahinumdum unsay kolor o klase sa laing sakyanan.

Matod ni Pepito nga sagad sa igo ni Reynaldo naa sa ulo gikan sa bala sa tag-as nga armas.

“Si Joel mitug-an nga nakahukom silang managsuon nga piyansahan ang biktima kay gitagalan nalang sa doctor og usa ka tuig gumikan sa cancer sa baga,” butyag ni Pepito

Si Batad nitug-an kanila nga gusto sa ilang mga igsuon nga isuroy si Reynaldo sa ilang lugar sa San Remegio, ika-uban sa iyang mga anak nga buhi pa kay usa ka tuig nalang ang tagal sa doctor.

Si Reynaldo nadakpan sa Provincial Intelligence Branch (PIB) niadtong Nobiyembre 2011 diin siya nakuhaan og P300, 000 nga balor sa illegal drugs.

Ang iyang asawa nga si Maribel Ibo nabilango sab sa BJMP jail sa Medellin human masikop sa 2015 kay nakuhaan og duha ka kilo sa gituohang illegal drugs uban sa igsuon ni Reynaldo nga si Eduardo.

Si Major Welther Grapa, hepe sa Medellin Police Station nga nahinabi sa Superbalita Cebu, nagkanayon nga si Arcenal naila na nga “Rey Siga” sa may dan A. Lopez, dakbayan sa Sugbo basi sa ilang nadawat nga impormasyon.

Matod ni Grapa nga kon basehan ang pagpatay, hayan grabe ang atraso ni Reynaldo.

Wa nila isalikway ang posibilidad nga grupo sa biktima sa illegal kalihukan nga naglagot ang niunay kaniya.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph