Masaligon ang bantugang weightlifter sa Pilipinas nga si Hidilyn Diaz nga daghan pang Pinay nga makasunod sa iyang lakang ug makahatag og dungog sa nasod sa nagkadaiyang international competitions.
Mao kini ang gipadayag ni Diaz sa interbyu sa www.abs-cbnnews.com samtang padayon siyang nangandam alang sa Asian Weightlifting Championships nga ipahigayon sa sunod buwan sa Uzbekistan ug usa ka qualifying event alang sa Tokyo Olympics.
Si Diaz, 30, nakasakmit na og silver medal sa 2016 Rio Olympics ug padayon siya sa iyang tinguha nga mahatag sa Pilipinas ang labing unang Olympic gold medal niini.
“Ang motivation ko, bakit ako lumalaban pa rin? Kasi alam kong kaya kong manalo,” asoy ni Diaz. “Alam kong kaya nating manalong mga Pilipino dito sa Olympics.”
Kon dili man gani matuman ang pangandoy ni Diaz nga Olympic gold, malaumon siya nga ang magsunod nga henerasyon sa Pinay nga weightlifters ang makatuman niini.
Matod ni Diaz nga nakitaan na niya og dakong potensyal ang iyang mga kauban sa RP team nga ningkampanya sa 2019 Southeast Asian Games.
“Sa totoo lang, marami tayo ngayon. Maraming atleta na sumusunod sa akin,” dugang ni Diaz. (ESL)