Sama sa niaging tuig, daghang mga plano sa Semana Santa ang wala matuman. Sama sa pagpalabay sa mga adlaw nga way klase ug trabaho, sa usa ka beach resort. Ang uban nagplano nga magpa bukid. Duna say daghan ang tawgon nato nga balik-probinsiya kay adlo sila mamalandong panahon sa Semana Santa.
Apan nabaraw ni tungod sa coronavirus nga hangtod karon atong gikahadlukan. Nan karon kay padung naman ta sa Semana Santa, naa ba gihapon ning maong mga plano? Sa akong pagtuo mas bentaha ron itandi sa miaging tuig kay niluagluag man ang atong panlihuklihok. Sa ato pa, magbaha ang mga tawo sa mga dapit nga maka-relax sama sa mga resort sa bukid ug baybayon. Ang gustong mobakasyon sa ilang lungsod o barangay siguro nangandam na.
Kining estoryaha wa gyu’y problema dinhi sa Sugbo, sigun sa tinguha ni Gobernador Gwen Garcia sa pagpabaskog og balik sa turismo ug ekonomiya sa probinsiya. Sa ato pa magbaha ang karsada sa daghang sakyanan.
Sa lalawigan sa Bohol nga dasok sa daghang tourist destination, gipaabot nga ang local tourism moarangkada sa mosunod nga mga adlaw.
Ang atong kapulisan dugay na nga nangandam pagsiguro nga ang kalinaw ug kahusay mopatigbabaw sa kanunay. Labaw sa tanan way mga health protocol nga malapas taliwala sa padayon nga pagsaka sa mga kaso sa Covid-19. Naghisgut man ta og mga biyahe sa karsada, diay nindot nga gustong ipatuman ang kapulisan sa lungsod sa Guindulman, Bohol. Gusto sab unta nako ni nga hatagan og pagtagad sa ubang lungsod o siyudad.
Si PLt. Edcel Delgado Petecio, hepe sa Guindulman, nagtuo nga magbaha ang mga motorista nga motadlas sa mga highway sa ilang dapit. Kini gumikan kay gawas sa ilang lungsod daghang mga dapit dihang bahina sa Bohol ang humot kaayong duawon sa mga bakasyonista.
Gawas sa Guindulman, silingan baya sab nila ang lungsod sa Anda nga naila sa puti nga baybayon. Sa ato pa moagi gyud ang kadaghanang sakyanan sa Guindulman.
Sigun sa plano ni Lt. Petecio, gawas sa police visibility, gusto niya nga mohulma og laing team sa mga pulis nga kuyogan og mga mekaniko nga magbahasbahas sa highway.
Ilang tahas mao ang pagtunol og quick response sa mga motorista nga makasugat og problema sa karsada. Pananglit dunay sakyanan nga maaberiya, ang rescue team dali nga makatabang pagsulbad sa problema. Usa ka portable nga kahimanan alang sa mga nahiyosan og ligid ang ilang dad-on. Duna sab silay electrician alang niadtong mga sakyanan nga mapawngan kay problemado sa battery ug
ubang electrical connection. Nahubsan ba kaha og gasolina apil sab ni sa ilang atimanon.
Kon pananglit may problemang medikal nga motumaw labaw pa ni nga ilang hatagan sa dinaliang pagtagad. Usa ka hotline number ang ilang ipaambit unya sa mga motorista.