Sa pagkonsiderar sa nagpadayong Covid-19 pandemic, ang Department of Education (DepEd) nioktaba sa early registration schedule alang sa school year (SY) 2021-2022.
Si Salustiano Jimenez, DepEd 7 director, atol sa press conference niadtong Huwebes, Marso 25, nagkanayon nga ang DepEd central office niisyu og DepEd Memorandum no. 8 series of 2021 sa paghunong una sa paghimo sa early registration nga gikatakda sa ‘Enero ngadto sa Pebrero 2021 ngadto sa Marso 26, Biyernes, ngadto sa Abril 30.
Ang early registration nagtutok sa pagkuha sa enrollees alang sa incoming pupils sa Kindergarten level ug incoming students sa Grades 1, 7, 11.
“Para masiguro pod nato daan nga ang atong mga skwelahan nga maka count na daan pila man ang kinahanglanon na classrooms, teachers, and unsa pa’y other needs of the school,” matod ni Jimenez.
Dugang pa, si Cristito Eco, DepEd 7 assistant director, niingon nga iyang giawhag ang mga ginikanan sa mga bata nga madawat sa pag-apil sa early registration isip kini nga kalihokan, gawas sa pagseguro sa incoming Kindergarten ug Grades 1,7 ug 11 students nga malista sa DepEd, makatabang usab kini sa pagkuha og data nga gikinahalan sa paghatag sa basic education sa mga bata.
Matod niya, ang early registration motabang sa DepEd 7 sa pag-ila ug pagtultol sa mga pinuy-anan sa mga bata nga dunay bikil sa panglawas; kadtong layo og pinuy-anan; nagpuyo sa barangay nga way tunghaan; mga tinun-an nga namalhin o milalin ang pamilya tungod sa pag-igo sa katalagman; nagpuyo sa dapit nga dunay armadong kagubot; mga biktima sa child abuse ug economic exploitation; ug
kadtong wala na makatungha apan interesado nga mobalik sa pag-eskwela.
Si Jimenez nagkanayon nga nagkalainlaing modalities nga gisagop sa paghimo sa early registration nga magdepende sa ilang sitwasyon sa dapit. Dason niya, kini mahimo pinaagi sa pagtabang sa partnered purok-leaders, online, paggamit sa applications o bisan sa house to house by teachers kon mahimo sa usa ka dapit.
Samtang si Eco nipadayag nga walay bayad nga pangayuon sa registration sa tanang DepEd schools.
Dugang niya nga ang mga bata nga kuwang og documentary requirements mahimong marehistro apan termporaryo hangtod maaksumiter kini sa gikinahanglan. / WBS