TULO ang giposasan apan tulo usab ang nakaikyas atol sa buy-bust operation sa Philippine Drug Enforcement Agency (PDEA) 7 ug Provincial Drug Enforcement Unit (PDEU) sa Cebu Police Provincial Office (CPPO) niadtong Sabado sa gabii, Marso 27, sa Dumlog-Climaco Road sa Barangay Anislag, siyudad sa Toledo.
Ang tulo nga nadakpan nakuhaan kinig lima ka bundle nga pinaugang marijuana nga motimbang sa 5 ka kilos nga mobalor ang tanan sa P600,000.
Giila ang mga suspek nga silang Jobert Cabelis, 22, habal-habal driver; Jerry Orillian, 44, furniture factory worker; ug Ralph Luaren Benesisto,19, usa ka dog handler.
Dugay na matod pa kini nga molupyo sa dakbayan sa Toledo apan dili kini lumad sa maong lugar.
Giingong makabaligya ang tulo og dahon sa marijuana og 30 ngadto sa 50 kilos sa matag semana.
Atol sa gihimong imbestigasyon, miangkon ang tulo ka dinakpan kinsa kadtong nakaikyas nga ilang giila nga silang alias 'Mark Abadinas' ug alias 'Junjun Abadinas' samtang ang usa wala mailhi.
Sila usab ang nagtanom sa marijuana ug sila lang ang gipabaligya niini sa mga kaila ra usab nila sa Toledo.
Apan matod ni Leia Alcantara, information officer sa PDEA 7, nga ila pa kining ipasusi kon unsa ka tinuod ang pangangkon sa mga dinakpan.
“Naa daw plantation, katong mga at large mao gyud daw to ang source,” matod ni Alcantara.
Mga residente sa dapit ang naghatag og impormasyon sa PDEA-7 labot sa illegal nga negosyo sa maong mga suspek gani naila na kini sa barangay nga mamaligyaay og marijuana.
Kasamtangan nga gitanggong sa selda sa Toledo City Police Station ang tulo ka dinakpan.
Gitakda nga pasakaan silag kaso karong adlawa, Marso 29, sa kalapasan sa Section 5 in relation to section 26 article 2 Republic Act 9165. / AYB