NAPATAY sa kapulisan sa Toril Police Station ang lalaki nga suspek sa pagpatay sa 5-anyos nga batang lalaki sa Phase 1, Batulosa, Barangay Bangkas Heights, Toril, Davao City.
Alas 7:15 sa buntag Dominggo, Marso 28, 2021, napatay ang suspek nga si Nolasco Sarno, alyas Manoy, hamtong ang pangedaron, human misukol sa operatiba sa Toril Philippine National Police (PNP) dihang gipailawom kini sa buy-bust operation didto sa Purok 4, Juan Dela Cruz Street, Barangay Toril Poblacion.
Ang Toril PNP nga gipangunahan ni Police Major Michael Uyanguren, hepe sa istasyon, nakigkoordinar sa Philippine Drug Enforcement Agency aron ilusad ang buy-bust operation.
Dihang namatikdan sa suspek nga mga pulis ang iyang ka-transaksyon, dali kining mibunlot sa iyang .38 revolver, hinungdan nga gilayon kining giniyutralisa, apan dead on arrival sa Mediquest Medical Hospital.
Nakuha sa posisyon sa suspek ang mga pinaugang dahon sa marijuana nga dunay street value nga di moubos sa P600.
Sumala sa kapulisan sa Toril PNP, ang napatay nga suspek maoy mipatay sa 5-anyos nga si Kenjay Gido kinsa napalgang dunay daghang dinunggaban sa lawas.
Midagan pa og dul-an mag-tulo ka semana una nadumdoman ang gitagoan sa suspek. Nakahigayon sab ang kapulisan sa pagdakop unta sa nahisgutan dihang nakig-transaksiyon kini sa poseur buyer nga mobaligya og marijuana.
Ang patay nga lawas sa suspek gihaya na sa iyang kabanay.