LAING pag-obserbar sa Semana Santa ubos sa pandemiya sa coronavirus disease 2019 (Covid-19). Seguro, mas naka-adjust na kita karon kon itandi sa miaging tuig 2020, diin ang tanan nakurat ug wala nakapangandam sa kalit nga pagkatap sa virus. Gipatuman ang hingpit nga lockdown sa tibuok kapupud-an.
Magpasalamat kita nga nakalabang sa unang tuig sa pandemiya. Apan nagpadayon pa ang hulga. Mibalik sa pagsaka ang kaso taliwala sa pag-abot sa bakuna sa nasod batok sa Covid-19. Sa pagkakaron, ang frontliners ug essential workers ang giuna sa pag-atiman. Ang baga nga masa wala pa masugdi sa pagpamakuna busa, dili kita mokompiyansa bisan sa relihiyusong panagtapok.
Si Cebu Archbishop Jose Palma, puno sa iyang pagbati atol sa iyang wali sa Cebu Metropolitan Cathedral kagahapon, Marso 28, nga nanawagan sa mga deboto sa lawom nga pagpamalandong ug hugot nga pag-ampo isip labing gamhanan nga hinagiban batok sa mga katalagman ug pagsuway sa kinabuhi.
Si Palma nipaambit sa daghang istorya sa balaang Bibliya nga mapanig-ing-nan sa atong kinabuhi sa kasamtangan ug nagpamatuod nga ang pagsagop sa Kahitas-an maoy mahukmanon diha sa pag-ampo uban sa paglihok, hinungdan nga wala magdumili ang simbahan sa pagkooperar sa kagamhanan sa pagpatuman sa health protocol.
Nangayo siya og dispensa nga daghang kalihokan sa simbahan ning semanaha ang puno sa limitasyon aron pagsunod sa protocol. Hingpit usab nga dili una pagpahigayon sa ubang relihiyusong kalihokan sama sa Visita Iglesia ug uban pang tradisyonal nga panagtapok sa mga debotong Katoliko.
Busa moduyog kita sa hiniusang pag-ampo, nga walay katugbang nga kalibotanong bili, ug ang luwas nga panaghiusa mohatag og kalig-on ug paglaum nga makalabang kita sa laing hagit sa pagpakabuhi ning kalibotan. Motunhay ang bag-ong normal sa dili madugay.