DILI na mapugngan ang pagsutoy sa pipila ka grupo nga nagsiyagit og "Run, Sara, Run" (RSR) ug "Dagan, Dayon Sara" (DDS).
May grupo nga nagtuyoktuyok sa tibuok Mindanao samtang may grupo sab nga tua karon sa kaulohan aron ibandilyo ang ilang tinguha sa pagpadagan ni Mayor Inday Sara Duterte sa bugnong lugaynon karong 2022.
May grupo nga gipangulohan nilang Pidot Pontillo samtang may grupo pod ni kanhi PCA board member Kiking Quimpan. May grupo sab sa mga kapitan, mga gobernador, mga mayor ug konsehal nga nag-indurso kang Mayor Inday para pagka-pangulo.
Apan sa laing bahin, mora'g dunay kisaw karon sa kampo sa Pambansang Kamao ug Senador Emmanuel "Manny Pacman" Pacquiao.
Didto ako sa Davao del Sur niadtong Dominggo ug mora na'g panahon sa kampanya kay daghang dagkong poster si Sen. Manny ang makita sa daplin sa highway.
Gibutang didto nga siya ang Presidente sa 2022. Kulang na lang sa pulong nga "Vote" o "Iboto" kay puwede nang tawagon nga "campaign poster" sa kandidato.
Anaay duha ka hulagway ang maong poster.
Ang usa kay ang nagpahiyom nga nawong sa senador nga nagsul-ob og puti nga Barong Tagalog samtang ang usa mao ang iyang hulagway isip kampeyon sa boksing.
Nagdusingot pa kini nga daw bag-o pa lang nahuman ang iyang bahug-bahog ibabaw sa ring kung asa nagmadaugon siya.
Wala akoy nakitang hinungdan nganong gibutang kining mga poster sa Davao del Sur gawas kung nagpasalamat ang senador sa maayong pag-abi-abi ni Davao del Sur Governor Douglas Cagas ug iyang pamilya sa dihang nibisita ang senador sa Digos City.
Basin pod kung may dakong pangilin o okasyon nga nahuman o umaabot pa diha sa Davao del Sur mao nga anaay poster. Busa ang una nakong pangutana kung nganong anaa nay poster ang senador sa mga lungsod sa maong probinsiya?
Ang ikaduha nakong pangutana kung sa Davao del Sur lang ba kini kay wa man koy nakitang susamang poster sa senador dinhi sa Davao City?
Kamo diha sa Davao Occidental, Davao Oriental, Davao de Oro ug Davao del Norte may poster sab ba siya dinha?
Ang ikatulo nakong pangutana kay kung modagan ba siya pagka-presidente sa Mayo 2022?
Sa isyu sa pagdagan, dako ang akong pagtuo nga modagan gayud si Sen. Manny pagka-presidente ubos sa Partido Demokratiko Pilipino (PDP)-Laban isip "standard bearer" niini.
Sama kini niadtong 2016 diin gisabak sa PDP-Laban isip kandidato si PRody ug nahimong chairperson sa Partido. Niadtong niaging tuig, gitugyan ni Senador Koko Pimentel ang pagka-presidente sa PDP-Laban ngadto kang Sen. Manny, butang nga wala gikahimut-i sa daghang lideres sa PDP-Laban kay wala kini mahisubay sa konstitusyon sa Partido. Puwede diay'ng ihatag sa kanhi presidente sa PDP-Laban ang iyang puwesto sa dili gani opisyal sa Partido nga wala moagi sa National Assembly?
Para kanako kuwalipikado si Sen. Manny nga modagan pagka-pangulo bisan pa man daghan ang niingon nga wa siyay tukmang kaalam nga maghupot sa maong puwesto.
Ang akoa lang gikabalak-an kung kinsa ang mabulahan ug kinsa ang mogamit kaniya kung molingkod na unya siya sa Malacanang?