COTABATO CITY -- Nanghikling ang mga sibilyan sa nahitabong engkuwentro sa duha ka pamilyang nagkabikil nga nagsugod alas 7:00 sa buntag hangtud alas 5:00 sa hapon, Dominggo, Marso 28, sa probinsiya sa Maguindanao.
Nagkapinusilay ang pamilya Dumbra ug Mamukaw nga dunay personal nga dumot sa yuta nga ilang giugmad.
Matud ni Maguindanao Police Provincial Office Director Colonel Donald Madamba nga "ghost barangay" ang mga barangay sa Pageda ug Gadungan, Talitay sa Maguindanao Province gumikan sa katag-katag nga engkuwentro sa magkaaway nga pamilya.
Nagsugod ang pinusilay sa diha nga gisulod sa pamilya Dumbra ang yuta sa pamilya Mamukaw nga namutol og punuan sa saging lakip na ang pagpanungkit sa lubi.
Namakwit ang mga silingan sa pamilyang Dumbra ug Mamukaw sa kahadlok nga mapagan sa kagubot.
Gikataho nga duha ang napatay ug usa ka sibilyan ang naigo sa mga saag nga bala.
Nadakpan sab sa mga sakop ni Talitay Mayor Montasir Sabal ang usa ka Renteng Mamukaw nga nalambigit sa kagubot.
Ang duha ka pundok mga armado og mga tag-as nga matang sa armas nga gitumbok nga pulos miyembro sa giila nga Moro Front.
Milihok na ang puwersa sa militar ug kapulisan aron kapugngan ang pagkuyanap sa kagubot ug maresolba ang away sa duha ka pamilya sa madaling panahon. (Edgar E. Fuerzas)