BISAN asa nga dapit basta magdangarang na ang eleksyon daghan ang ayuda nga moabot. Diri sa Talamban, maayo pa ang espalto sa dalan giguba na kay aron sementohon. Primero nakong kita sa espalto nga gilukba sa backhoe nahibung ko’g dako nganong wala giuna og trabaho ang mga dalan nga buslot na. Pagkahinumdum na ko nga duol na ang sunod piliay sa Mayo 9, 2022 nahimuot na lang ko.
Unya, bag-o lang gianunsyo a dakbayan sa Sugbo nga dunay 10,000 ka cash cards alang sa mga senior citizens nga nag-edad og 60 ug pataas. Kining 10,000 ka cash cards gipuno sa 15,000 kabuok nga gihatag niadtong Disyembre. Niadtong Sabado, Marso 27, gihatdan sa cash assistance ang mga senior citizen sa ilang tagsa-tagsa ka panimalay alang sa buwan sa Enero hangtud ning buwan sa Marso 2021.
Pasalamat ta sa atong mga opisyales sa kagamhanan sa dakbayan sa Sugbo nga gisayo ron og hatud ang cash assistance sa mga senior citizen nga morag nadelitar sa miaging’ duha ka tuig. Apan nabolilyaso gamay ang paghatag sa cash cards kay, matud pa, dunay mga senior citizens nga wala makapa-aktibar sa ilang PIN (personal identification number) nga gihatag sa Landbank.
Ang cash card maayo nga pamaagi kay segurado ang kwarta apan ang problema kay dili tanan senior citizen makamao mogamit o di ba nahikalimot sa instruksyon. Sa liwas sa Semana Santa morag modaghan na ang proyekto gikan sa atong kagamhanan nga atong makita. Ang kadaghanan ani mga dalan o highway nga bisan og maayo pa ang espalto o semento lukbahon aron pulihan og bag-o nga espalto o semento.
Mao nga di ta mahibulong mga kaigsoonan kon mao lang gihapon ang gilapdon sa atong kadalanan kay gibalikbalik ra man og espalto o semento ang mga kaladanan bisan og maayo pa. Unya, moresulta pa gyud sa trapiko kay naay mga kontraktor nga dili motuman og butang sa husto nga traffic sign alang sa direksyon sa mga sakyanan. Kining pundo alang sap ag-espalto o semento sa mga maayo pa nga dalan kon gigasto pa unta ni sa pag-abli og bag-o nga mga dalan, maminosan na unta ang problema sa trapiko.
Usa ka dako nga hinungdan sa problema sa trapiko mao ang dalan nga usa ra sama sa highway padulong sa norte gikan sa dakbayan sa Sugbo. Ang tanan klase nga sakyanan, gamay o dako, mosubay aning kunohay four lanes apan duha ra ang maagian tungod kay ang kilid sa highway gihimo nga parkingan sa mga sakyanan labina sa dapit nga dunay mga tindahan sa pagkaon apan walay kaparkingan sa mga sakyanan.
Ang highway sa lungsod sa Liloan karon huot na sa trapiko tungod sa daghan nga mga tindahan nga naa kilid sa dalan ug ang mga sakyanan sa mamalit anha ra moparking sa kilid sa highway. Ambot og nakahibawo ba si Liloan Mayor Cristina Frasco ning mao nga sitwasyon. Ang trapiko sa Consolacion miluag na karon di sama kaniadto mag-urong ang sakyanan og 30 minutos.