NAPUTOL ang duha ka mga tiil sa usa ka porter sa pantalan sa lungsod sa Santa Fe, isla sa Bantayan, Sugbo human napiit sa damyo sa barko alas 3:50 sa kaadlawon sa Dominggo, Marso 28, 2021.
Si Cruz Pescante Cordova, 56, minyo, taga Brgy. Okoy, lungsud sa Santa Fe, naputlan sa iyang duha ka mga tiil human siya mapiit sa damyo.
Si Police Lt. Eden Rex Baguio, hepe sa Santa Fe Police Station nga nahinabi sa Superbalita Cebu, nagkayon nga si Cordova kauban sa ubang mga porter, nag-ilog sa pagsakay sa Shuttle Ferry 27 dihang nidunggo.
Si Cordova niambak dihang hapit na mabutang ang damyo sa barko, apan siya nadakin-as hinungdan nga nalugpitan iyang duha ka mga tiil.
Gidali siya sa pagdala sa Bantayan District Hospital, apan gumikan kay naputlan sa duha ka tiil, gibalhin sa tambalanan sa dakbayan sa Sugbo.
“Kuwan, Sir, ana man gyud ni sila mag-ilog ba kinsay makauna pag-alsa sa mga bagahi sa mga pasahero. Sakto nga ubos na ang damyo, ambak dayon siya unya dangog man, nadakin-as, napiit hinuon,” dugang ni Baguio.
Ang management sa barko nipasalig sa kabanay nga ilang abagan si Cordova.
Ang mga kabanay ni Cordova gipaabot sab sa kapulisan nga mobalik sa ilang buhatan alang sa ilang lakang kon mosang-at sab silag reklamo.
Si Cordova nagtrabaho sa usa ka arastre sa maong lungsod.
Hinuon ang Lungsod niabag kang Cordova.
Gibutyag ni Baguio nga ikatulo na kining higayon nga dunay porter nga napiit. Ang ikaduha namatay.
Karong liwas sa Semana Santa, magtagbo sila uban sa local government unit ug ubang mga sektor aron malikayan nga di na masubli ang hitabo.