Dear Atty. Joan,
Maayong adlaw kanimo Atty. Joan. Duna unta koy ipakonsulta nimo kabahin sa nahitabo sa akong bata pinaagi niining sulat.
Ang akong batang anak nga nagpangedaron og otso (8) anyos gipagunit sa kinatawo sa duha ka batang lalake. Gisumbong kini sa akong anak usa ka semana ang milabay human sa hitabo.
Gipagunit ang bata sa ilang mga kinatawo ug gitudluan pod ang akong bata sa pagduwa sa kinatawo niya. Gibayran dayon siya og singko pesos (P5.00) human sa hitabo.
Na-report kini nako sa among Local Social Welfare and Development Office (LSWDO) ug niingon ang mga nalambigit nga mga bata nga nagpangedaron sila og 14 ug 15 anyos.
Katong katorse anyos, gipahamtangan lang og community service ug duna kamiy gipirmahan kasabutan alang sa maong pagserbisyo sa nakasala nga bata.
Mangutana unta ko Atty. Joan kon unsay mabuhat nako alang sa nakasala sa akong bata nga nagpangedaron og 15 anyos.
Duda pod nako nga namakak lang ang bata ug iyang ginikanan sa iyang edad kay sa akong tan-aw lapas sa 18 anyos ang pamostura sa maong bata.
Hinaot nga imo kong matambagan sa angay nga buhaton, Atty. Joan.
Daghang Salamat.
Imong tigtampo,
Helena
Dear Helena,
Una sa tanan maayong adlaw usab kanimo diha, Helena. Salamat sa imong pagsunod ning lindog.
Ang atong balaod mipabor sa pagtan-aw sa “minority” o pagka-menor de edad sa mga bata. Kon adunay pagkwestyon sa edad sa bata, ideterminar ang edad base sa birth certificate sa bata o sa baptismal certificate.
Kon matumbok ang saktong pangedaron sa bata, diha na nato masusi ang implikasyon ini ubos sa Juvenile Justice and Welfare Act (JJWA).
Kon tinuod nga nagpangedaron og kinse anyos ang bata nga nakasala sa imong anak, dunay himuon nga pagsusi kon dunay discernment o abilidad ang bata nga makahibalo kon unsay sakto o sayop.
Ang inisyal nga pakisusi mahimong himuon sa mga social workers apan ang dunay gahum sa pagdeterminar sa discernment sa bata mao ang korte.
Kon makita nga 15 anyos ang lalake nga nakalapas ngadto sa imong anak ug duna kiniy discernment sa pagkahitabo sa insidente, matawag ang bata isip Child in Conflict with the Law (CICL). Ang iyang salaod o kalapasan mao ang acts of lasciviousness in relation to Anti-Child Abuse Law.
Ang korte na ang modisider kon unsay angay nga diversion proceedings para sa maong CICL.
Daghang salamat, Helena, sa imong sulat tampo ug hinaot nakahupay ang maong tambag sa naghuot mo karon nga galamhan.
Imong alagad,
Atty. Joan
[Lindog sinuwat ni Atty Joan Saniel-Amit, Executive Director inubanan sa mga abogado sa Children’s Legal Bureau sama nilang Atty. Jenny Vieve Cabradilla ug Atty. King Anthony Perez. Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]