ANG Cebu City nakatala og 63 ka bag-ong mga kaso sa coronavirus disease 2019 (Covid-19) sa Marso 29, 2021, labing ubos gikan niadtong katapusang semana sa Enero.
Ang Emergency Operations Center (EOC) nikuha og sample sa 620 ka mga individual, kinsa adunay spymtoms ug close contact sa mga napositibo.
Nasuta nga 10.16 porsyento kanila positibo sa Sars-CoV-2, nagdala sa Covid-19.
Si Konsehal Joel Garganera, deputy chief implementer sa EOC, niawhag sa publiko nga magpadayon sa ilang pagkamabinantayon ug di mokumpyansa hilabi na nga taas ang holidays.
Iyang gipahinumdoman nga katapusang nisugod og saka ang kaso liwas sa taas nga holiday sa Pasko ug Bag-ong Tuig.
Way gusto nga masubli pa ang maong hitabo.
Dugang ni Garganera nga kinahanglan nga mapabilin nga kontrolado sa Dakbayan ang pagsaka sa kaso sanglit human sa Holy Week, pag-abot sa Abril 14, saulogon sa Pilipinas, partikular sa Sugbo, ang ika-500 ka tuig nga pagkahimugso sa Kristiyanismo.
Ang Barangay Guadalupe gihapon ang adunay labing daghan apan 104 na lang kanila ang nataptan sa nakalabay nga 10 ka adlaw.
Gisundan kini sa Talamban (68), Lahug (54), Apas (53), ug Punta Princesa ( 43).
Aron way panagtapok nga mahitabo ning Semana Santa, si Mayor Edgardo Labella mimando sa kapulisan sa paghugot sa pagbantay sa mga merkado publiko, simbahan ug kabaybayunan sa South Road Properties aron way mangaligo.
Susihon usab sa kapulisan ang taho nga dunay grabeng tapok sa mga tawo sa Transcentral Highway (TCH) nga unta gidili man kini karong panahuna.