Dili na kinahanglan pa nga mopaubos sa 14 ka adlaw nga quarantine sa tanan nga mga Sugboanon nga repatriated Overseas Filipino Workers (OFWs) ug returning non-OFWs sa lalawigan sa Sugbo.
Kini subay sa bag-ong kamandoan ni Cebu Governor Gwendolyn Garcia nga iyang gipaagi sa Executive Order No. 17.
Gumikan kini sa nasabutan tali ni Garcia ug sa mga opisyal sa Department of Tourism (DOT), Department of Health (DOH), Department of the Interior and Local Government (DILG), Bureau of Quarantine (BOQ), Overseas Workers Welfare Administration (OWWA), Mactan Cebu International Airport Authority (MCIAA), GMR-Megawide Airport Corporation, airline companies ug Hotel, Resort and Restaurant Association of Cebu (HRRAC).
Kini paagi nga mamenosan ang bayranan sa mga OFW sa pagpauli dinhi sa Sugbo.
Sukwahi sa kaniadto nga paagi nga kinahanglan pa nga mopaubos sa 14 ka adlaw nga mandatory quarantine ang mga mopauli gikan sa laing nasud.