NAKATALA og kalit nga pagtaas sa mga bag-ong kaso sa coronavirus ang Cagayan de Oro human usa ka locally stranded individual (LSI) ug 30 ka mga residente ang mipositibo sa maong virus.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 4,120.
Lakip sa 30 ka mga bag-ong kaso, 20 niini mga local cases with link, siyam ang mga lokal index nga mga kaso, ug usa ang patay.
Misaka usab ang ihap sa mga aktibo nga kaso sa dakbayan, gikan sa 126 naa na karon sa 145. Sa maong numero, 37 niini na-admit sa Northern Mindanao Medical Center ug uban pang mga ospital sa syudad, 103 ang mga outpatients, ug lima ang mga ROFs/LSIs.
Sumala ni Acting City Health Officer Dr. Lorraine Nery, sa 4,120 nga kinatibuk-ang kaso sa Covid-19 sa syudad, 429 ang mga returning overseas Filipino workers/locally stranded individuals (ROFs/LSIs) ug 3,691 ang mga local transmissions.
Matud ni Nery, sa 3,691 nga mga local nga kaso, 189 ang mga persons deprived of liberty (PDLs), 1,961 ang mga local index cases, ug 1,510 ang mga local cases with link.
Nakatala usab og 11 ka mga Covid-positive nga mga kaso nga karon naka-recover. Anaa na karon sa 3,780 ang ihap sa mga nakarekober nga mga kaso sa dakbayan.
Sa maong numero, 302 ang mga LSIs, 120 ang mga ROFs, ug 3,358 ang mga lokal nga kaso (community: 2,837; Apors: 521).
Ang recovery rate sa Cagayan de Oro anaa na sa 91.74 percent.
Ang ihap sa mga namatay sa Covid-19 sa syudad naa sa 195.