NAKAALERTO na ang mga sakop sa Digos City Police Station (DCPS) aron bantayan ang mokatkat sa Mount Apo ning panahon sa Semana Santa.
Sa pakighinabi sa SunStar Superbalita ngadto sa hepe pinaagi sa telepono Biyernes sa buntag, Marso 31, 2021, gitataw ni Lieutenant Colonel Vici Anthony Tababa nga kinahanglang kompleto sa mga permit ang tanang climbers ug moagi sab sa City Tourism Office.
Matud ni Tababa nga naka-deploy na ang ilang mga tourist police didto sa Barangay Kapatagan nga maoy agianan sa pagsaka sa bulkan.
Apan di niini masulti kung pila na ang ihap sa mga nisaka sa bulkan.
Naandan na sa mga trekkers ang pagkatkat sa Mount Apo panahon sa Mahal nga Adlaw sanglit usa kini sa mga dapit nga nindot mag-penetensiya.
Di pa dugay, diriyot pasirad-an sa Department of Environment and Natural Resources ang Mount Apo human nakita ang pipila ka mga climbers nagbilin sa ilang mga basura sa bisan asa ug vandalism sa mga bato, diin usa sa mga kalapasan sa pag-protekta niini.
Ning panahona, nagpasidaan ang mga awtoridad sa tanang trekkers nga mahimong responsable sa ilang mga hugaw aron maprotektahan ang kinaiyahan.
Ang Mount Apo mao ang pinakataas nga bukid sa tibuok nasud nga adunay gitas-on nga 9,692 ka tiil kun 2,954 metros.