NAKATALA og 15 ka mga bag-ong kaso sa coronavirus disease (Covid-19) ang Cagayan de Oro, pulos mga local transmissions, sumala sa report sa City Health Office Huwebes, Abril 1.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 4,135.
Sumala ni City Health Officer Dr. Lorraine Nery, sa 15 ka mga bag-ong lokal nga kaso, usa ang lokal authorized person outside residence (Apor), walo ang mga local index nga mga kaso, lima ang mga local case with link, ug usa ang patay.
Sa 4,135 nga kinatibuk-ang kaso sa Covid-19 sa syudad, 429 ang mga returning overseas Filipino workers/locally stranded individuals (ROFs/LSIs) ug 3,706 ang mga local transmissions.
Ang Cagayan de Oro adunay 150 ka mga active cases, 38 niini na-admit sa Northern Mindanao Medical Center ug uban pang mga ospital sa syudad, 108 ang mga outpatients, ug upat ang mga ROFs/LSIs.
Nakatala usab og 11 ka mga Covid-positive nga mga kaso nga karon naka-recover. Anaa na karon sa 3,789 ang ihap sa mga nakarekober nga mga kaso sa dakbayan.
Sa maong numero, 303 ang mga LSIs, 120 ang mga ROFs, ug 3,366 ang mga lokal nga kaso (community: 2,844; Apors: 522).
Ang recovery rate sa Cagayan de Oro anaa na sa 91.63 percent.
Ang ihap sa mga namatay sa Covid-19 sa syudad naa sa 196.