GIKATAHAPANG kawatan nga nasikop nabawian og 14 ka mga biseklita sa kapulisan alas 3:30 sa hapon sa Biyernes Santo, Abril 2, 2021.
Nasikop sa hot pursuit operation alas 9:39 sa gabii sa Huwebes Santo ang gihulagway nga banggiitang kawatan nga giilang si Osbaldo Osabel Cabase, 42, alyas “Junjun,” dunay kapuyo, taga All Season 2, Sitio Tagunol, Cogon Pardo, dakbayan sa Sugbo.
Nasubay si Cabase human nireklamo si Nicole John Esguerra,19, taga Purok Pedro, Brgy. Tabunok, dakbayan sa Talisay nga gikawat ang iyang road bike nga Twitter brand.
Si Police Lt. Col. Gerald Ace Pelare, hepe sa Talisay City Police Station nga nahinabi sa Superbalita Cebu, nagkanayon nga si Esguerra nangayog abag kanila human nahanaw ang iyang road bike.
Matod ni Pelare nga ilang nasubay si Cabase human nakakuha silag kopya sa close circuit television (CCTV) camera-footage gikan sa City of Talisay-Traffic Operations and Development Authority (CT-TODA).
Tungod sa pagkasikop ni Cabase, nabawi ang 14 kamga biseklita, nga sagad gikawat gikan sa mga taga Dakbayan sa Sugbo.
Atol sa pagkasikop niini, nakuhaan pa siyag laing duha ka mga pakite sa gituohang shabu.
Si Pelare nagkanayon nga si Cabase mag-surveillance sa iyang mga target.
Hinuon wa nila isalikway ang posibilidad nga duna kini laing mga kauban.
“Mountain bike ra iyang kawaton. Malipat ang tag-iya sakyan dayon niya dalhon sa dakbayan sa Sugbo, ibaligya barato kaayo,” dugang ni Pelare.
Gumikan niini, daghang bikers nga mahilig sa mountain bike mopalit dayon.
Apan si Pelare mipadayag nga angay mag-amping sab ang buyers aron di sila mabiktima.
“Sama aning Cabase nga mibaligyag barato, kinawat, pwedi silang nakapalit makasuhan sa Anti-Fencing Law,” matod ni Pelare.
Unang nabawi sa pinuy-anan ni Cabase ang walo ka mga biseklita.
Si Jonathan Tumulak, pangu sa CT-TODA, niingon nga unang nakuhaan og footage si Cabase nga nangawat og folding bike.
Sa pagkuha ni Cabase sa road bike ni Esguerra, iyang gibilin ang folding bike.
“Ang folding bike iya gibilin sa lugar nga gikawat niya ang road bike. Hibung na lang tag iya sa RB nga folding bike na iya bike nga gibilin kilid sa tindahan sa San Isidro,” matod ni Tumulak sa Superbalita Cebu.
Di kini unang higayon nga ang CCTV footage sa CT-TODA nakasulbad og krimen.
Ang nakaligis sa usa ka siklista sa Dakbayan sa Naga nailhan ug nasikop pinaagi sa CCTV footage sa CT-TODA.
“Cooperate man ta sa PNP,” matod ni Tumulak.