Vallena: Kawat sa bike

DIHANG nagsugod ko sa mountain biking niadtong Disyembre 2009, pipila ka mga buwan human mamatay ang among anak nga si Mary Heart sa dengue fever, nagtuo ko nga sayon ra kaayo ang biseklita. Apan sa ako pa lang pagdala sa mountain bike gikan sa SunStar padung sa among balay sa Bacayan, mga usa ka oras kapin ang akong pagtindak.

Makapila kaha ko mohunong padulong sa balay kay gawas nga kutas, nagkagahi sab ang akong pagtindak samtang nagkadugay. Naglibog pa ko sa pag shift sa atubangan ug likod. Naabtan pag pipila ka mga buwan una nako nakat-unan ang shifting sa gears ug rings.

Ako ning gihisgutan alang sa bag-o pang nagkat-on og biseklita. Hinuon, di sama sa akong pagsugod sa MTB, kadaghanan karon kay two-ring na ang front samtang nakaabot nag 50 ang sagad sa mga ngipon sa likod. Apan bisan na, mas maayong mag master sa shifting gears. Importante kaayo ni kon magsige ka na og saka sa bukid.

Usahay gani masipyat pa ko sa pag shift kay duha ka brands ang akong naagian, Shimano ug Sram. Sa duha, mas ganahan ko sa Sram kay unyag pislit sulod dayon. Di sama sa Shimano nga kinahanglan ka pag duha ka pitik ug usahay tulo pa.

Matod sa akong higala nga si Engr. Roy Gualisa nga magsige siya og tuno sa iyang Shimano drive train. Lahi sa Sram nga tagdugay ka magtuno.

MAGBANTAY

Karong panahuna, nunot sa pagkusog sa pag biseklita, angay tang magbantay kay kusog kaayo ang kawat karong panahuna. Mas maayong mo invest og mga lock ug alarm system nga mataud sa atoang biseklita. Naa may mga alarm system ug lock nga maayog klase. Kanang kadena nga di dayon maputol ug paresan og alarm system, di na makasayonsayon ang kawatan.

Kon mahimo, ayaw i-isplay sa gawas sa balay ang biseklita kon wa kay mga iro sama namo nga dunay unom. Bentaha kon duna kay mga iro ug dunay kanunay mga tawo sa balay kay dunay makabantay. Mas maayo nga dunay gate ug ang mga iro naa kanunay sa gawas.

Pait ug sakit kon makawatan ka og biseklita unya mao ni ang imong kanunay gigamit isip transportasyon o mao ni ang imong bugtong kalingawan uban sa mga higala.

PAGSUGOD

Kon mahadlok kang magkat-on og bike, mas maayong anha ka magsugod sa mga dan nga naa sa mga suok nga dapit. Ingon ana man sab ko kaniadto sa bata pa ko. Sa sityo Bolho, Barangay San Jose ko gakat-on og biseklita nga iya sa akong uyoan.

Maihap rang sakyanan mangagi sa dapit kay gawas nga bag-o ra ang karsada, rough pa kaayo agian. Ambot sab adtong panahuna, grabe ang akong gana sa pagkat-on og bike, di ko mahadlok mosikad.

Ang akong asawa nga si Chelo Vallena sa GMA 7 Balitang Bisdak naka gain og kompyansa sa pagsikad pinaagi sa among night ride. Human ani, kaming duha kanunay nang magkuyog sa pag bike.

Akong i-suggest nga mas maayong magsugod sa grupo until maka gain ka nag confidence sa pagsikad. Sa biking, ang sugod ray lisod. Suwayi.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph