SUPERBALITA CEBU

Management sa condotel nga nalumsan ipatawag

IMBESTIGASYON: Si Lapu-Lapu City Mayor Junard Chan misaad sa inahan ni Yza Lexxine Lomongsod nga si Elona Jean Aying Lumongsod nga iyang ipaimbestigar ang kamatayon sa bata aron mahatagan og hustisya kon duna may angay manubag. Si Chan miduaw sa haya sa bata. / Gikan sa FB page ni Mayor Junard Chan

Ipatawag ni Lapu-Lapu City Mayor Junard “Ahong” Chan ning semanaha ang mga tagdumala sa usa ka condotel sa siyudad diin nalumos ang usa ka 4 anyos nga batang babaye mga semana kapin ang milabay.

Niadtong Huwebes Santo, Abril 1, 2021, giduaw ni Chan ang condotel aron pagsusi sa swimming pool diin nalumos ang bata.

“Gusto ko nga ma-imbestigar ang maong kamatayon gumikan kay duha na ka bata ang nakalas niining maong swimming pool. Ako personal nibisita sa maong lugar kay gusto nako makita ang situation,” matod ni Chan sa iyang Facebook post.

Si Chan nisaad sa inahan ni Yza Lexxine Lumongsod, Elona Jean, nga iyang ipaimbestigar ang pagkalumos sa bata aron mahatagan og hustisya.

“Akong siguraduhon nga mahatagan og hustisya ang pagkamatay sa inosenteng bata hilabi na sa taho nga aduna say susama nga insidente ang nahitabo sa lain pang bata sa susamang swimming pool,” matod sa mayor.

Si Chan niduaw sa haya sa bata niadtong Marso 30, 2021 agig pagpakita sa iyang simpatiya sa pamilya, labina sa inahan nga single mother.

“Walay undang ang paghilak sa inahan nga usa pa gyud ka single mom kay naglisod siya sa pagdawat sa nahitabo nga gani kada gabii motulo ang iyang luha sukad sa una pang adlaw sa iyang pagkawala.” dugang ni Chan.

Si Yza nalumos niadtong Marso 23, 2021 samtang nag-check in uban sa iyang inahan ug mga ninang.

Nitumaw sa imbestigasyon nga ang inahan nibilin sa bata ngadto sa mga ninang kay motrabaho pa siya samtang nataligam-an ang bata nga nisawom sa swimming pool.

Ang swimming pool giingong wa bantayi og lifeguard.

Nasayran ni Chan nga di lang si Yza ang nalumos sa swimming pool. (REV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!