EASTER Sunday karon kun Dominggo sa Pagkabanhaw. Kon atong basihan ang Bibliya, nabanhaw si Hesu Kristo tulo ka adlaw human Siya gibiay-biay, gipasakitan ug gilansang sa Krus sa mga Hudeyo. Nabuhi Siya pag-usab ug nibalik sa tiilan sa iyang amahan, ang atong giila nga Ginuo. Gumikan sa resurrection o pagkabanhaw ni Hesus, dinhi Siya giila nga anak sa Diyos.
Mao nga karong adlawa, gisaulog sa mga Kristiyanos ang Pasko sa Pagkabanhaw. Kon wala pa unta ang pandemiya, giobserbar karon sa mga parokya ang dakong kalihukan sa Simbahan sa Romano Katoliko, ang Sugat. Sugaton nato ang pagkabanhaw sa atong giilang Anak sa Diyos. Gawas sa Minglanilla, ang lungsod sa Argao ug parokya sa Guadalupe ug San Nicolas, dakbayan sa Sugbo, nabaniog ang ilang Sugat. Ambot kon nadayon ba ang sa Minglanilla nga pinaagi lang sa on-line.
Apan ang kadaghanan karon magsaulog ning Pasko sa Pagkabanhaw sa dagat kay mangaligo. Mao kini ang naandan kay panahon karon sa selebrasyon. Pero ambot og tugutan ba kaha gihapon sa mga local government units (LGUs) ang pagpangaligo kay gipasirad-an sa ubang mga LGU ang mga beach resort sama sa dakbayan sa Danao. Ang uban sama sa dakbayan sa Lapu-Lapu di pasudlon ang mga tawo sa mga public ug private beach resorts kon way bookings.
Pero hinaot nga ning Pasko sa Pagkabanhaw, di lang kalipay, kasadya ug kamaya ang atong pagabation sa pagsaulog ning espisyal nga adlaw. Hinaot nga kanunay natong ibutang sa atong huna-huna ug kasing-kasing si Kristo. Mas atong hatagan og gibug-aton ang pagpakabanhaw ni Hesus human Siya nagpakamatay aron pagtubos sa atong kasal-anan pinaagi sa pagpakita og gugma ug pagmahal sa isig ka tawo.
Kanunay natong isil-sil sa alimpatakan nga ang pulong Kristo nagkahulogan og pasaylo, panaghinigugmaay ug kaangayan. Gipasaylo kita ni Kristo pinaagi sa pagtubos sa atong mga sala. Gihigugma kita Niya gumikan kay siya nagpasakit aron maluwas kita sa atong kasal-an. Ug kaangayan gumikan kay patas ang iyang pagtratar kanato, makasasala ka man o dili. Happy Easter Sunday sa tanan. (bobbygnalzaro@gmail.com)