GIPAKITA sa longest Filipino champion Donnie “Ahas” Nietes nga wa gihapon molubad ang iyang abildad sa boxing ring bisan pa man sa taas nga panahon niyang pahuway.
Sa edad nga 38-anyos nahimong world champion pagbalik si Nietes human niya gidominar ang mas batan-on nga si Pablo Carrillo pinaagi sa unanimous decision aron ibulsa ang World Boxing Organization (WBO) International super flyweight strap sa Caesars Palace Bluewaters, Dubai, UAE, kagahapon, Abril 4, 2021 (RP Time).
Sulod sa 27 ka mga buwan wala makaaway si Nietes apan hanas gihapon kini moaway.
Wa makaarti ang kusog nga kumo sa Colombian nga si Carrillo tungod sa mga jab ug counter attacks ni Nietes.
Ang tulo ka judges mipabor kang Nietes pinaagi sa iskor nga 99-91, 98-92 ug 96-95.
Basi sa CompuBox, si Nietes mibuhi og 425 ka mga kumo ug 97 niini ang miigo kang Carrillo. Samtang ang Columbian mipasulod lamang og 81 sa 415 ka kumo nga gilabay niini.
“I’m happy kay nindot kaayo iyang gipakita nga performance bisan paman sa 2 years nga lay-off niya. Nindot iyang gipakita control, niya ang fight,” batbat ni Edmund Villamor, ang long-time trainer ni Nietes ug kuyog niya sa Dubai.
Ang maong kadaugan mao ang ika-43 ni Nietes sulod sa iyang 44 ka mga away. Wa pa mapilde si Nietes sa iyang uwahing 36 ka mga away. Ang nag-inusara niyang pilde niadto pang 2004 sa controversial nga spilt decision batok kang Indonesian Angky Angkotta didto sa Indonesia.
Sa kadaugan, niabli ang posibilidad nga matuman ang gipangandoy nga away ni Nietes batok sa bisan asa nila ni Juan Francisco Estrada, Srisaket Sor Rungvisai o Roman “Chocolatito” Gonzales.
Dugay nang gusto makontra ni Nietes ang usa sa tulo ka fighters gani iyang gibakante ang WBO junior bantamweight belt niadtong 2019 para sa posibilidad nga makontra ang usa kanila.
Ang WBO junior bantamweight belt mao ang ikaupat nga world division title ni Nietes, nakuha kini niya pinaagi sa split decision win kang Kazuto Ioka niadtong Disyembre 31, 2018 sa Macau. Mao kini ang uwahing away ni Nietes sa wala pa siya nakig-away kang Carrillo.
Niadtong tuig 2020 nasirado ang boxing stabler ni Nietes nga ALA Promotions tungod sa epekto sa hulga sa pandemiya.
Bag-ong oportunidad ang miabli kang Nietes kay gikuha man kini sa MTK Global and D4G Boxing Promotions sa hinapos nga bahin sa tuig 2020 ug gilakip siya isip co-main event sa WBO super featherweight match ni defending champion Jamel Herring ug Carl Frampton.
Si Nietes misaka sa 43-1-5, 23 KOs nga rekord samtang si Carillo mihagba sa 25-8-1, 16 KOs nga baraha. (RSC)