Sa panahom sa usa ka ESPN sports commentator, ma-knockout si Filipino boxing legend Manny Pacquiao kon madayon ang pagpakigharong niini batok kang World Boxing Organization (WBO) welterweight champion American Terence Crawford.

Sa usa ka espisode sa First Take sa ESPN, si Stephen A. Smith mihulagway kang Crawford nga usa sa duha ka labing maayong mga boksidor sa tibuok kalibutan ning panahuna ug sa iyang tan-aw, wala’y dag-anan si Pacquiao batok kang Crawford.

“When you look at Pacquiao, he’s great, he’s aged, we get that. I’m saying this because of Crawford, not because of Pacquiao. I’m just saying Crawford is, he’s on another level,” batbat ni Smith. “I love Pacquiao and I’m scared he’s gonna get knocked out.”

Sa kasamtangan, padayon ang negusasyon alang sa panag-away nila ni Crawford ug Pacquiao nga giplanuhang ipahigayon karong Hunyo 5, 2021 sa Abu Dhabi.

“I think by the end, he beats Pacquiao up, knocks him out.”

Ang 42 anyos nga si Pacquiao katapusang miaway niadto pang Hulyo, 2019 diin midaog kini pinaagi sa split decision batok kang American Keith Thurman aron langkaton ang World Boxing Association (WBA) welterweight belt.

Gumikan kay taodtaod na sab nga wala nakaaway ang Pambansang Kamao ng Pilipinas, gitantangan siya og bakus sa WBA.

Si Pacquiao, kinsa kanhi 8-division world champion, naggunit og 62-7-2, 39KOs nga rekord samtang ang 33 anyos nga si Crawford naghupot og limpyong rekord nga 37-0, 28KOs.

Usa ka bantugang trainer ang miingon nga kon modaog si Pacquiao batok kang Crawford, hayan dili malalis ug siya ma ang makonsiderar nga "Greatest of All Time" sa kalibutan sa boksing. (ESL)