Dondon gikuha sa Phoenix

NAGSUGOD na si kanhi Philippine Basketball Association (PBA) three-point champion Dondon Hontiveros sa iyang bag-ong karera sa natad sa basketball.

Ang gitawag og “Cebuano Hotshot” nahimo nang sakop sa Phoenix Super LPG Fuel Masters coaching staff basi sa taho sa www.pba.ph.

Nagsugod siya’g trabaho sa Fuel Masters niadtong wala pa gipahunong ang team workouts sa National Capital Region ug ubang mga probinsya dihang gipatuman og og balik ang Enhanced Community Quarantine (ECQ) gumikan sa pagsaka sa kaso sa Covid-19.

Gikuha si Hontiveros sa Fuel Masters isip shooting consultant ug apil sab siya sa mga assistant ni headcoach Topex Robinson.

“He’s to focus on skills development and of course, shooting,” matod ni team manager Paolo Bugia.

Ang three-time PBA champion nakatrabho na sa Fuel Masters sulod sa duha ka mga semana apan nibalik kini sa Sugbo human gipatuman ang lockdown sa kaulohan.

“He was not able to stay for a long period, but nakapag-practice na siya,” pasabot ni Bugia.

“If may opportunity, maybe after this ECQ. Next cycle kung makapag-test siya and he comes back, maybe sa kabilang grupo naman siya puwedeng iikot.”

Si Hontiveros, kinsa usa ka konsehal sa dakbayan sa Sugbo, midaog sa PBA Three-Point shootout niadtong 2007, usa ka Mythical Second Team member, Samboy Lim Sportsman awardee, ug 13-time All-Star.

Sa iyang 15 ka mga tuig sa PBA, ang produkto sa University of Cebu (UC) Webmasters nakaduwa sa Tanduay Rhum Masters, Air 21 Express, San Miguel Beermen ug Alaska Aces.

Sa wala pa siya nasulod sa PBA, ang 43 anyos nga si Hontiveros nabantog sa nabungkag nga Metropolitan Basketball Association (MBA) isip tirador sa Cebu Gems. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph