BISAN sa solemne nga pag-obserbar sa Biyernes Santo, Abril 2, ang mga sugarol og manok walay pagtahod sa relihiyusong tulumanon.
Nasikop sa kapulisan sa nagkalainlaing lungsod sa lalawigan sa Leyte ang 71 ka mga tawo nga nalambigit sa ilegal nga sabong o tupada atol sa Biyernes Santo, Abril 2.
Base sa report sa kapulisan, sa lungsod sa Inopacan, Leyte nasikop ang labing daghan nga niabot sa pito ka tawo.
Gisundan kini sa lungsod sa MacArthur nga dunay 6; Abuyog, Kananga, Babatngon, Mahaplag, Barugo, Albuera, ug Leyte, nga dunay tag upat matag lungsod.
Sa Pastrana ug Dulag, Leyte dunay tag tulo; sa Jaro ug Baybay, Leyte dunay tag duha samtang sa Julita, Burauen ug Dagami tag 1.
Nasakmit sa kapulisan ang 50 ka mga manok igtatari; 12 ka mga tari ug ubang mga magamit sa tupada nga mokabat sa kapin P61 mil.
Matod ni Police Colonel Rodelio Samson, direktor sa LPPO, ang mga nadakpan pulos naaktuhan nga niapil sa sugal ug dunay uban nga nakadagan ug nakaikyas.
Sa Ormoc City, mokabat sa 17 ang nasikop sa kapulisan sa managlahi nga barangay.
Walo ang nasikop sa Barangay Liloan; upat nasikop sa Barangay Doña Feliza Mejia ug lima ang nasikop sa Barangay Patag. (JKDP)