SUPERBALITA CEBU

Nadela: Tindak para sa kalikupan

Asoy Ni

NAGBAHA ang mga motorista padung sa nagkadaiyang destinasyon panahon sa Semana Santa. Apan niadtong Abril 1, 2021, usa ka panon sa mga siklista ang niilog og eksena diha sa karsada. Sila ang mga partisipante sa VDM Ride for Green and Healthy Environment. Usa ka Charity Ride nga gipasiugdahan sa akong higalang sportsman nga si Voltaire Montebon.

Ang tindak nagsugod sa dalan Escario sa dakbayan sa Sugbo sa alas 4 sa buntag ug nitadlas sa highway sa kalungsoran ug mga siyudad sa lalawigan. Gitapos nianang alas 4 sa hapon sa maong adlaw. Mokabat sa 200 ka kilometros ang gilatas sa labing minos 60 ka mga siklista, balon ang determinasyon nga pinaagi sa ilang pagpasingot, mapadangat ang bugtong mensahe nga mao ang pagpalig-on sa kampanya pagpanalipod sa atong kalikupan.

Maka-proud ang maong proyekto ni Voltaire nga nahimo nakong higala sud na sa tulo ka dekada. Sa nagtrabaho pa ko sa ABS-CBN, sugod niadtong dekada 90, usa ka batan-on nga bus-ok kaayo og lawas ang akong kakompetensiya matag tingpamahaw sa usa ka carenderia atbang sa among sibyaanan sa dalan P. del Rosario. Ang maong batan-on wala lang damha nga nakakulit og pangalan sa sports nga soccer.

Siya si Voltaire ug ang kan-anan mao ang among suki gipanag-iya sa iyang inahan nga si Mother Yvonne, inabagan sa iyang Papa Polding. Suki ni sa mga reporter, cameraman, production crew, hosts, anchor, dramaturgo, artista ug office personnel. Kaon sa adlawan, human unyag ka gabii. Mao ni giingon sa mga silingan, kon gusto ka makakita og artista adto lang sa kang Mother Yvonne nga carenderia.

Way bisan usa ka anak ni Mother Yvonne ang natintal nga mag-reporter o mag-artista. Si Voltaire sa soccer nanghawod. Iyang pangalan nahimong sumsuman sa kalibutan sa soccer. Ang nakanindot kay gawas sa iyang kahanas sa maong sports, gikaluhaan pa gyud kini og leadership skills.

Mao nga wala nako mahibulong nga daghan sa iyang mga kaubang soccer player sa kanunay naa sa iyang kiliran. Sa dili pa hangtod sa pagka human sa dula, makadaghan ko makadungog ni Voltaire nga momaymay sa iyang mga kauban didto sa ilang carenderia.

Pagligid sa panahon hangtod nga nabalhin mi og lokasyon sa Jagobiao, Mandaue City, tagsa nalang mi magkita ni Voltaire.

Akong nasayran bisan sa gawas sa soccer field, padayon ang iyang pagpangalagad sa iyang team mates. Ang uban iyang gitabangan nga makatrabaho dinhi sa ato ug sa gawas. Pag-uso sa triathlon, subli nakong nabasahan ang pangalan ni Voltaire. Ug sa miaging semana, ang Charity Ride nga gituyo sab niya pagmugna isip fund raising para sa asawa sa usa ka higala nga may cancer.

Way kabutangan sa kalipay ang gibati ni Voltaire ning talagsaong kalampusan sa unang edition sa VDM Ride. Tindak para sa kalikupan, nga padayong giabusohan sa uban. Gipangga sa kadaghanan ug gipangwartahan sa pipila nga mapahimuslanon.

Kanus-a ta makat-on? Congratulations Voltaire ug daghang salamat sa mga siklistang nagpakabana.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!