GAWAS sa pagpahigayon og tigbakay sa pipila ka dapit sa lalawigan sa Sugbo, hapsay ug malinawon sa kinatibuk-an ang Semana Santa sa Sugbo
Si Police Colonel Alladin Collado, direktor sa Cebu Police Provincial Office (CPPO), wala silay natala nga dagkong panghitabo gikan sa Huwebes Santo, Abril 1, ngadto na sa Dominggo sa Pagkabanhaw, Abril 4.
“Generally peaceful pa naman sa ngayon no at wala pa namang other major reports no from other police stations hopefully sana tulo-tuloy itong ano natin,” matod ni Collado.
Personal nga misuroy si Collado sa lalawigan ug nakita niya nga kasagaran sa mga Sugboanon mobisita sa mga simbahan sa kalungsoran ug modiretso usab sa nagkadaiyang beach resort.
Tanang resort sa probinsya gipabantayan og pulis ug 50 porsiyento nga capacity niini, sama sa mga simbahan.
Nagpasalamat si Collado sa church leaders lakip na sa mga opisyal sa lokal nga kagamhanan nga nahimong hapsay ang pagtimaan sa Semana Santa.
Daghan usab ang mga nadakpan nga nagtigbakay sa mga barangay sa nagkalain-laing kalungsoran atol gyud sa Biyernes Santo.
Gitahasan ni Collado ang iyang operation branch pag-consolidate sa mga dakop sa matag police station.
Gituohan usab ni Collado nga karon, Abril 5, mamalik na sa siyudad sa Sugbo kadtong adunay trabaho.
Tungod niini, iyang gimandoan ang iyang station commanders nga monitoron ang bus terminals basin maghuot ang mga pasahero.
Gani, matod niya nga magpadayon ang ilang pagbantay sa mga pantalan ug bus terminals tungod sa oplan summer vacation.
Samtang, 19 ka mga tawo ang nadakpan sa mga sakop sa City Intelligence Unit (CIU) sa Cebu City Police Office (CCPO) nga naatlan nga nagtigbakay atol sa Sabado de Gloria sa alas 5 sa hapon, Abril 3, sa sitio Tambisan, Barangay Tisa sa siyudad sa Sugbo.
Gawas sa 19 nga nadakpan, nakadagan usab ang kapin sa 20 ka mga lalake nga nakabantay sa presensya sa mga police.
Matod ni Police Lieutenant Colonel Randy Caballes, hepe sa CIU sa CCPO nga sa mga nadakpan, nagpangidaron kinig 20 ngadto na sa 65 anyos.
Duha usab ka manok igtatari ang naimbargo ug P2,000 nalang nga maoy sugal ang ilang nakuha tungod kay ang uban nga kwarta nadala sa mga nanagan.
Dugang ni Caballes nga ang tigbakayan sa maong lugar giingong taudtaod na hangtod nga adunay residente sa dapit ang nakatug-an sa kapulisan nga maoy hinungdan nga gihimoang operasyon.
Dugang ni Caballes nga kasagaran sa mga sugarol nga manugal sa tigbakay taga Barangay Tisa ra usab apan adunay pipila nga gikan sa taga silingang barangay sa dakbayan. (AYB)