GIDAKOP ang chairman sa Sangguniang Kabataan (SK) sa Barangay Daanlungsod, lungsod sa Tuburan sa lalawigan sa Sugbo sa Dominggo, Abril 4, sa alas 12:00 sa tungang gabii.
Si Police Staff Sgt. Elvin Rivas sa Tuburan Police Station nga nahinabi sa Superbalita Cebu nagkanayon nga nakadawat silag tawag gikan sa nagpakabanang residente sa lugar nga dunay kagubot nga nahitabo.
Si Laind Kurt Montecillo, 23, ulitawo, SK chairman sa nahisgutang barangay, uban sa laing batan-on nga si Diocelz Stephen Cañete, 19, nagpuyo sa nahisgutang lugar, pulos hubog.
Samtang, atol ning pagsuwat, at-large ilang laing kauban nga sila si Jade Alcantara, ug Vicente Roble.
Giingong gikulata sa duha nga walay igong hinungdan ang drayber sa habalhabal nga si Carlo Rosales Estejo, 32, ulitawo ug taga Purok Bombil sa samang barangay.
Si Estejo wala na kapamasahero ug nagpatambal human nabunalan ang ulo ug nakulatahan.
Matod ni Rivas, sa pag-abot sa ilang mga tropa, naabtan nila ang karambola ug sinumbagay sa mga batan-on.
Ang mga suspek naabtan sa kapulisan nga nagtinabangay sa pagkulata sa biktima, dason ni Rivas, hinungdan nga gipangsignit ang duha ka suspek.
Matod pa niini, hubog ang SK chairman ug mga barkada apan nahutdan og beer ug nangitag dugang mainom.
Sa paggawas nila, ilang nakit-an ang biktima ug gitabangan og kulata.
“Hubog na sila, kining SK chairman miduol sa biktima nagpaabot sa pasahero, gikalitan sa pagbunal sa botelya sa ulo,” dugang ni Rivas.
Ang biktima misukol apan nalupig siya kay nagtinabangay ang mga suspetsado pagkulata niini.
Gibalhog sa selda sa kapulisan apan pagkahapon kagahapon, Abril 4, ang mga suspek gibuhian human nagkasabot tali sa biktima.
Nasayran sa kapulisan nga dunay karaang panagbangi ang mga suspek ug biktima.
Ang Superbalita Cebu nisuway sa pagkuha sa habig sa SK chairman pinaagi sa pagpatunga ni Rivas sa Tuburan Police Station apan giingong nagdumili kini sa paghatag og pamahayag ang lider sa kabataan sa barangay.